Ivanisheviç-Dinamos: Me kthe 4 mijë eurot!

Ish futbollisti malazez i Dinamos, në sezonin 2005 2006, Branimir Ivanisheviç, ka paditur në FIFA klubin blu, me pretendimin e mosshlyerjes së 4 mijë eurove, teksa institucioni më i lartë i futbollit i ka dhënë të drejtë. Lajmi bëhet i ditur nga burime zyrtare në FSHF, nga ku mësohet se dje ka mbërritur me faks edhe shkresa e FIFA s.

Kjo e fundit bën të ditur që Dinamo është e detyruar t'i shlyejë 4 mijë euro ish futbollistit të saj, në bazë të kontratës që ka nënshkruar me të. Sipas rregullores së FIFA s, nëse ky detyrim nuk shlyhet brenda javës, atëherë Dinamos i hiqen tri pikë nga kampionati. Ndërkohë, nëse nuk shlyhet edhe javën tjetër, rregullorja parashikon zbritje një kategori më poshtë.

Gjithsesi, tashmë blutve medoemos do t'u duhet të nxjerrin nga arka këtë shumë për ish-fantazistin e tyre, që pati një aventurë të shkurtër në Shqipëri. Ai luajti shumë pak ndeshje, në kohën kur trajner i Dinamos ishte Vasil Bici, e më pas kroati Ivan Kataliniç. Tashmë, 28-vjeçari Ivanisheviç aktivizohet aktualisht me Rudarin e Plevlës në kampionatin malazez.

Kujtojmë që ky nuk është rasti i parë që futbollistët e huaj fitojnë çështjet me klubet shqiptare. Më i vuajturi duket se ka qenë klubi "Tirana", që disa herë ka shlyer ish-futbollistët e saj për shkak të prishjes së njëanshme të kontratës. Para disa vitesh, futbollistit holandez Jan Venhof klubi bardheblu është detyruar t'i paguajë një shumë prej 30 mijë dollarësh.