"Gjoleka" dhe "Zonja Shnajder" në DVD

Dy autorë klasikë që duhet të ndjekin rregullat e kohëve moderne të shpërndarjes së filmit në treg. Filmat "Gjoleka, djali i Abazit" (2006) i Dhimitër Anagnostit dhe "Trishtimi i zonjës Shnajder" i Pirro dhe Eno Milkanit, sapo janë hedhur në qarkullim në formatin DVD.

Në pikat e videotekave të Tiranës mund të shohësh reklamën që përfaqëson edhe "cover"-in e DVD. Po ai portret i Artur Gorishtit me mustaqet e Çeços që ka pas shpine një familje dhe vetë Gjolekën.

Filmi i Anagnostit që në kinema ka pasur shikueshmëri të dobët, gjatë ditëve të Vitit të Ri, i blerë nga TV Klan, është transmetuar dy herë në ditë, në mëngjes dhe në mbrëmje. Është keqtrajtimi i radhës që u bëjnë filmave shqiptarë ekranet e televizioneve.

Në fakt ligji "Për Kinematografinë" nuk përcakton gjë për përdorimin e prodhimeve filmike shqiptare nga televizionet përveçse kur sqaron marrëdhëniet me televizionin shtetëror publik dhe privat që "janë të detyruara të shfaqin për publikun, në marrëveshje me producentët a distributorët, veprat filmike të prodhuara me fond shtetëror jo më parë se një vit nga data e prodhimit të filmit (data e premierës së veprës)."

Më pak i konsumuar duket "Trishtimi i zonjës Shnajder" pavarësisht se propaganda që po i bëhet këtij filmi qoftë edhe tek afishe si kjo e DVD së prodhuar dhe shumëfishuar nga "Elrodi", i shkohet deri në fund imazhit të një soap-opera.

Të dy filmat marrin spunto nga dy realitete të ndryshme, njëri për dhunën dhe familjen patriarkale në vitet tridhjetë, tjetri për komunizmin kadife në Çeki dhe si e përballoi këtë një shqiptar që pa mbaruar studimet, u shtrëngua të kthehej në Shqipëri sepse këtej kishte filluar hataja. Por filmi nuk ka për qëllim të merret me punët e Shqipërisë.