Bie masivi në tunelin e Thirrës, rëndë punëtori

MIRDITE- Është në gjendje të rëndë shëndetësore punëtori i Bektel-Enka, Zef Gjokaza i cili u aksidentuar mbrëmë teksa po punonte në tunelin e Thirrës. 50-vjeçari Gjokaca, babai i 9 fëmijëve ka qenë në ballë të galerisë kur është zënë poshtë nga masivi i madh shkëmbor. Pas ndihmës së parë mjekësore në Reps ai është dërguar me urgjencë, në gjendje koma, në Turqi.

Ngjarja ka ndodhur mbrëmë rreth orës 11.00 kur Zef Gjokaca nga Domgjoni i Fanit (Mirditë) ka qenë duke punuar për shpërthimin me mina të shkëmbit ku do të vazhdohej hapja e tunelit. Aksidentalisht është rrëzuar masivi shkëmbor para se ai të shpërthente duke zënë brenda punëtorin. Autoritetet e firmës ndërtuese kanë thënë se ishte e paparashikuar përbërja e formacionit të shkëmbit.

Punëtori i firmës Bektel-Enka ka ndenjur 30 minuta nën gurë deri kur është nxjerrë nga masivi që e kishte zënë. Ai po punonte për ndërtimin e rrugës Durrës-Kukës, në aksin më të vështirë të saj, Rrëshen-Kalimash.

Pasi i kanë dhënë ndihmën e parë mjekësore në kampingun e urgjencës mjekësore në Reps, vetë firma ka mundësuar transportin e tij me helikopter drejt Turqisë ku po merr mjekim të specializuar. Siç konfirmohet 50-vjeçari, Gjokaca është ende në gjendje kritike për jetën.