EULEX-i rinis gjykimin në veri

Zëdhënësja e komponentës së drejtësisë në kuadër të EULEX-it, Kristina Herodes ka konfirmuar për Radion Evropa e Lirë se procesi gjyqësor kundër dy personave të akuzuar për plaçkitje në Leposaviq, i anuluar të hënën, ka rinisur sot në Gjykatën e Qarkut, që gjendet në pjesën veriore të Mitrovicës.
Qytetarët serbë në Mitrovicë kishin penguar nisjen e këtij procesi gjyqësor të udhëhequr nga gjykatësit e EULEX-it, duke kërkuar që së pari të zgjidhej çështja e funksionimit të drejtësisë në veri në kuadër të planit 6 pikësh.
Sot nuk ka protesta jashtë objektit të Gjykatës së Qarkut dhe raportohet se seanca po zhvillohet në kushte normale. /REL/