'Jo reduktim të trupave të KFOR'

Sekretari i përgjithshëm i NATO-s, Jaap de Hoop Scheffer ka reaguar ashpër rreth spekulimeve për zvogëlimin e mundshëm të trupave të KFOR-it, duke thënë se nuk ka asnjë plan dhe vendim për reduktimin e paqeruajtësve në Kosovë.
"Dua të jem i qartë, ata që spekulojnë për reduktimet e mundshme të KFOR it, përfshirë këtu edhe njerëzit në uniformë, nuk flasin në emër të NATO-s", është shprehur kreu i NATO-s nëpërmjet deklarate për shtyp.

Reagimi i Schefferit vjen pas disa deklaratave në Bruksel dhe në Prishtinë se gjoja NATO do të zvogëlojë numrin e trupave në Kosovë.

Sekretari i përgjithshëm i NATO-s thekson se për momentin nuk ka asnjë plan, e as ndonjë vendim politik për reduktimin e KFOR-it. "Ndryshimet e mundshme në KFOR do bëhen vetëm në bazë të vendimeve politike të aleatëve, ndërsa ky vendim mund të merret vetëm pasi aleatët të jenë të sigurt se zvogëlimi i mundshëm i ushtarëve të KFOR it nuk do të rrezikonte sigurinë në Kosovë", ka thënë Scheffer. /QiK/