"Për procedurën duhet të jesh i papunë dhe të kesh nerva çeliku"

Shqiptarët e tranzicionit janë ngopur me premtimet e pambajtura elektorale. Edhe qeveria e tanishme nuk bëri përjashtim: në fillim të mandatit, në korrik 2005, premtoi se do ishte "qeveria e shërbimit dhe shërbesave", se "do të luftojë korrupsionin me zero tolerancë", se "shqiptarët në zgjedhjet lokale, tetor 2006, do të votojnë me karta biometrike".

Sot, në fund të mandatit katërvjeçar, të gjitha këto premtime nuk janë mbajtur. E pafalshme është mospajisja e shqiptarëve me letërnjoftimi jo vetëm për votimet e 28 qershorit, por dhe aktivitetin e tij të përditshëm në zyrat e shtetit, ambasadat e huaja, biznes, etj. Sot, në radhët përpara minibashkive, qytetarët pyesin:

Pse u zvarrit ky proces për katër vjet, pa asnjë shkak madhor, dhe tani shtyhemi këtu në radhë sepse "po skaduaka koha"? Kjo manovër, për mendimin tim, ka një qëllim: manipulimin e votës së qershorit.

Vonesat dhe koha që të ha procedura, janë skandaloze. Duhet të jesh i papunë dhe të kesh nerva çeliku, që të mund të përballosh gjithë procesin.

Qytetari, në fillim duhet të shkojë në zyrën e postës, të presë në radhë për të paguar lekët e kuponit. Pasi e merr atë, nis një kalvar tjetër pritjeje, në minibashki. Radhë e gjatë e papërballueshme edhe aty.

Radhët, shpenzimet dhe torturat, pesëfishohen për shqiptarët emigrantë, ata janë të detyruar të paraqiten në atdhe për të aplikuar e për t'u pajisur me këto dokumente.