Sulmi terrorist në Pakistan trondit botën e sportit, anulohen ndeshjet

Policia në Pakistan është vënë në gjurmë të personave të armatosur që sulmuan në qytetin Lahorë ekipin e kriketit të Sri Lankës.
Personat e maskuar hapën zjarr mbi një mikrobuz, në të cilin ishin sportistët dhe dy makina shoqëruese të policisë.
Gjashtë policë pakistanezë dhe një shofer u vranë, ndërsa tetë pjesëtarë të ekipit të Sri Lankës u plagosën. Dy prej sportistëve po kurohen në spital. Sulmi erdhi nga dy drejtime pas lëshimit të një granade dore.
Sulmuesit që dukeshin në të njëzetat, u larguan me shpejtësi. Shefi i policisë në Lahorë tha se ata dukeshin të stërvitur mirë.
Ndërsa guvernatori i provincës, tha se ata kishin përdorur të njëjtat taktika që u përdorën në sulmet e Bombejit në muajin nëntor.

Sulmi anulon ndeshjet
Presidenti i Pakistanit, Asif Ali Zardari, e dënoi sulmin, homologu i tij nga Sri Lanka e cilësoi atë sulm frikacakësh, ndërsa India u shpreh e shokuar për atë që kishte ndodhur.
Këshilli Ndërkombëtar i Kriketit (ICC) thotë se ka pak gjasa që në Pakistan të luhen në të ardhmen takimet ndërkombëtare.
Duke folur gjatë një konference për shtyp në Londër, shefi ekzekutiv i ICC, Haroon Lorgat, tha se deri tani sportistët e kriketit nuk ishin parë si shënjestër sulmesh, por tani situata kishte ndryshuar.
Këshilli Ndërkombëtar i Kriketit është duke shqyrtuar me urgjencë nëse Pakistani duhet të jetë bashkëorganizatori i Kupës së Botës në këtë sport, pas anulimit të turneut nga ana e Sri Lankës.
Ndeshjet për Kupën e Botës pritet të fillonin në mbarë katër vendet e Azisë Jugore, përfshirë edhe Pakistanin në 2011.
Ministri pakistanez i Informacionit, Sherry Rehman, tha se sulmi ndaj disa lojëtarëve të ekipit nga Sri Lanka kishte dëmtuar aftësinë e vendit, për të marrë pjesë në një sport, për të cilin vendi i tij është i apasionuar.
Australia ka refuzuar të dërgojë një ekip në Pakistan, ndërsa Sri Lanka ndodhej në Pakistan për të mbushur vendin bosh të lënë nga India, e cila ka refuzuar të marrë pjesë në këtë turne.