Filologjiku, 400 studentë rrezikojnë provimet

Dekanati i Historisë dhe i Filologjisë kërcënon se nuk do të fusë në provime studentë pa karta identiteti

Rreth 400 studentë, që marrin leksione në fakultetin e Historisë dhe Filologjisë në Universitetin e Tiranës, rrezikojnë të mos futen në provimet sezonale, si shkak i mostërheqjes brenda afatit të përcaktuar nga qeveria, të kuponëve të aplikimit për kartat e reja të identitetit.

Kur ka kaluar më se një muaj nga vendimi i qeverisë për lehtësimin e procedurave të marrjes së kuponëve për kategorinë e studentëve, dhe po kaq nga urdhëresa e lëshuar nga rektorati, studentëve duket se nuk ua ka ndjerë shumë për të tërhequr kuponin.

Në fakultetin e Historisë dhe Filologjisë janë të paktën 420 studentë, të cilët kanë deklaruar se nuk kanë pasaportë dhe që u lind nevoja për t'u pajisur të parët me karta identiteti. Në këtë numër përfshihen studentë që vazhdojnë ciklin e parë dhe dytë të studimeve.

Burime pranë fakultetit Filologjik, u shprehën për gazetën "Shekulli" se, deri dje, megjithëse lista e studentëve pa pasaportë është e gjatë, shumë pak prej tyre janë paraqitur në sekretari për të tërhequr kuponin.

Dekanati i fakultetit të Historisë dhe Filologjisë ka kërcënuar studentët pa pasaportë se, në rast se do të vazhdojnë të mos aplikojnë për marrjen e kartave të identitetit, do të penalizohen deri në masën ekstreme; atë të mos futjes në provimet sezonale në muajin qershor.

Afati i fundit kur studentët duhet të tërheqin kuponin pranë fakulteteve ku ata studiojnë është data 10 qershor, pas kësaj date sekretaritë në fakultete do të ndërpresin çdo veprim që lidhet me procesin e kartave të identitetit.

Ende nuk dihet se cili do të jetë vendimi i rektoratit të Universitetit të Tiranës. Në një deklaratë të mëparshme për shtyp, rektori i Universitetit të Tiranës, Dhori Kule, është shprehur evaziv në mendimin nëse duhej ose jo të pengoheshin studentët të merrnin pjesë në provime, nëse nuk aplikonin për karta identiteti, ndërkohë që i takon senatit të UT-së të vendosë për masat e mëtejshme që do të ndërmerren.