Matematika, llogarisni mirë kohën e ushtrimeve

Nesër zhvillohet provimi i dytë me detyrim. Në testimin e Matematikës do të marrin pjesë 40 mijë maturantë

Nesër, në orën 9.00, të gjithë maturantët duhet të jenë të rreshtuar në hyrjen kryesore të shkollës. Këshilla e parë, që duhet të kenë parasysh, para se të dalin nga banesat, është pasja me vete e mjetit të identifikimit, pasaportë ose kartë identiteti. Kush harron, është i destinuar të mbetet jashtë provimit.

Matematika është provimi i dytë me detyrim, që maturantët do të japin në Maturën Shtetërore 2009. Teza, e cila do të dalë nga ngujimi, mbrëmjen e sotme do të jetë e përshtatur në 7 variante, një për secilin nga profilet e shkollës së mesme.

Përmbajtja e testit do të jetë e njëjtë vetëm për një profil të shkollës së mesme, ku ndryshimi do të jetë renditja e pyetjeve. 60 për qind e testit do të jetë nga programi i orientimit, i shpërndarë në shkolla që në muajin shkurt, ndërsa 40 për qind do të jenë ushtrime të përzgjedhura nga vetë AVA, për të testuar shkathtësinë e maturantit në zgjidhjen e problemave.

Nga burime të AVA-s, numri i maturantëve që do të marrin pjesë nesër në provimin e Matematikës, pritet të jetë rreth 40 mijë, nga të cilët një pjesë u takojnë maturantëve që nuk kanë arritur të marrin provimet me detyrim gjatë viteve të kaluara.

Testi që do të shpërndahet ditën e nesërme gjatë provimit të Matematikës, ashtu si edhe testi i Letërsisë dhe Gjuhës Shqipe, do të jetë i ndarë në tri shkallë vështirësie, gjë e cila do të aplikohet edhe në secilin profil të shkollës së mesme, ku testi më i vështirë do të jetë për maturantët në profilin natyror.

Bazuar në skemën hartuese, në çdo linjë të përmbajtjes, do të përfshihen kërkesat e tri niveleve të vështirësisë, në raportet 2:2:1, duke filluar prej nivelit minimal. Pyetjet e testit do të jenë dy llojesh: me zgjedhje të shumëfishtë dhe me shtjellim të argumentuar.

Me mbylljen e këtij provimi, rregullorja për 2009-ën përcakton se kanë të drejtë të kandidojnë për të vazhduar studimet në institucionet e arsimit të lartë publik vetëm nxënësit që vlerësohen kalues në të katër provimet e Maturës Shtetërore, respektivisht në dy provimet e detyruara dhe dy provimet me zgjedhje.

Nëse një nxënës ka vlerësim kalues vetëm në njërin nga provimet e detyruara të Maturës Shtetërore, rezultati i tij ruhet, pra, konsiderohet i vlefshëm edhe në vitet në vazhdim.

Nxënësi që është mbetës, qoftë edhe në një nga provimet e detyruara të Maturës Shtetërore në sesionin e parë, nuk ka të drejtë të futet në provimet me zgjedhje. Pas zhvillimit të dy provimeve të detyruara do të fillojë periudha e përgatitjes përfundimtare për studimet e larta.

Ajo që duhet të kihet parasysh ditën e nesërme, është përqendrimi në pyetjet që mendohen se mund t'u jepen zgjidhje, pasi kalimi i një periudhe të gjatë me ushtrime, të cilat nuk gjejnë zgjidhje, do të sillte rritjen e stresit dhe njëkohësisht humbje kohe të çmueshme.

Fillimisht maturantët duhet të njihen me rezultatet e dy provimeve të dhëna, të krijojnë vetë një ide se sa pikë mund të mbledhin dhe vetëm më pas të bëjnë renditjen e degëve se ku duan të studiojnë.

Megjithatë, maturantët që kanë hyrë në provimet e këtij viti me rezultate të mbartura nga vitet e shkuara, duhet të dinë se në procesin e llogaritjes do të merren parasysh koeficientet e vjetër.

Kështu, nëse nxënësi kërkon t'i ruhet rezultati i mëparshëm në përllogaritjen e pikëve për sistemin meritë-preferencë për këtë lëndë merret koeficienti që lënda ka pasur në vitin që është dhënë.

Në rast se nxënësi e ka dhënë më shumë se një herë një lëndë të caktuar në provimet me zgjedhje dhe kërkon t'i njihet rezultati i saj, do t'i njihet rezultati i arritur në vitin e fundit kur e ka dhënë lëndën.