Korrigjimi, njihen edhe përgjigjet e paplota

Të shtunën, provimi i parë i lirimit për klasat e 9-ta. Rreth 50 mijë nxënës do të testohen në Gjuhë Shqipe dhe Lexim Letrar.

Në skemën e korrigjimit do të kihen parasysh edhe përgjigjet e paplota, ndërkohë që pikët do të konvertohen në nota.

Ndërsa të premten merr fund një vit i gjatë shkollor, një ditë më pas, të shtunën, nxënësit e klasave të 9-ta do të ulen në banka për të dhënë provimin e parë të lirimit në lëndën e Letërsisë dhe Gjuhës Shqipe, testim ky, i cili do të çelë një etapë të re në mënyrën e dhënies së provimeve të lirimit në ciklin 9-vjeçar shkollor.

Në bazë të statistikave të bëra publike nga Ministria e Arsimit, në testimin e parë të provimeve të lirimit do të marrin pjesë rreth 53 mijë nxënës nga e gjithë republika.

Testi që nxënësit do të zgjidhin do të jetë i njëjtë për të gjithë republikën dhe do të ketë të njëjtën përmbajtje, ku i vetmi dallim do të jetë ndarja në variante, për të shmangur kopjimin e mundshëm.

Formulimi i testit po bëhet nga Agjencia e Vlerësimit të Arritjeve të Nxënësve, ndërsa korrigjimi dhe administrimi i procesit do të zhvillohet nga Drejtoritë Arsimore Rajonale dhe Zonale.

Mësuesit që do të angazhohen në ditën e zhvillimit të provimit, pra administratorët, është vendosur që të mos jenë nga shkolla ku do të bëhet provimi, por do të këmbehen me njëri-tjetrin.

Ashtu sikurse edhe në Maturën Shtetërore, çdo mjedis provimi do të ketë një përgjegjës administrimi. Punimet e nxënësve do të jenë të sekretuara, me mënyra më të thjeshta se ato të Maturës Shtetërore.

Nuk do të ketë barkode, por një numër regjistrimi të mbyllur, i fshehur menjëherë sapo shënohet në test dhe në fletën e regjistrimit, i cili do të dekonspirohet dhe do të hapet vetëm kur mbaron korrigjimi, pra kur numrit në fjalë i akordohet sasia e pikëve që ka marrë realisht në punimin e tij. Struktura e tezës që do përdoret në provimin e lirimit do të jetë e ngjashme me atë të Maturës Shtetërore.

Ajo do të ketë 20 pyetje, nga të cilat 10 do të jenë me alternativa dhe 10 me zhvillim, pak a shumë sikurse veprohet në tezën e provimeve me zgjedhje që jepet në Maturën Shtetërore. Provimet do të bëhen vetëm me shkrim.

Punimet e nxënësve, që i takojnë juridiksionit të një zyre arsimore rrethi apo një drejtorie arsimore rajonale, do të mblidhen dhe do të korrigjohen në një qendër vlerësimi të përcaktuar prej Drejtorisë Arsimore Rajonale.

Ndryshimi i vetëm është se nëse në Maturën Shtetërore të gjitha punimet grumbullohen fillimisht në Tiranë dhe më pas shpërndahen në katër qendra, në provimet e lirimit, punimet e çdo rrethi mblidhen në qendrën e ngritur pranë tij.

Ekipi i vlerësuesve të këtyre punimeve është caktuar të jetë nga mësuesit më të mirë të rrethit, ndërkohë që pritet që numri i mësuesve të rekrutuar për të kryer administrimin e provimit të jetë rreth 3 mijë të tillë.

Vlerësimi i testit do të bëhet për çdo përgjigje të dhënë, qoftë kjo edhe e pjesshme, e thënë ndryshe, një përgjigje e paplotë do të vlerësohet me pikë, të cilat do të shënohen nga korrigjuesi në një tabelë të veçantë.