E sëmurë prej 11 muajsh, mjekët nuk i vendosin diagnozën

Pacientja 13-muajshe, Xhesika Daullja, vuan çdo ditë nga temperatura e lartë që kur ishte 2-muajshe. Prindërit: Na ndihmoni se kështu na vdiq edhe vajza e parë

Ethet nuk i janë ndarë asnjëherë që kur ka lindur. "Digjet" gjithmonë nga temperatura e lartë pasi nuk i zbret kurrë nën 38 gradë.

Vogëlushja 13-muajshe, Xhesika Daullja, është pacientja që po mundon prej 11 muajsh gjithë stafin e pediatrisë së Qendrës Spitalore Universitare "Nënë Tereza" për t'i gjetur një diagnozë. Babai i saj, Festim Daulli, nga Berati pohon se Xhesika është rritur më shumë në spitale se në shtëpinë e saj, por ende nuk e dinë se cila është sëmundja që po e mundon.

Por fatkeqësia e familjes Daulla nuk mbaron këtu pasi Xhesikës i ka vdekur edhe një motër e cila kishte të njëjtat simptoma, por ajo ndërroi jetë dhe kurrë nuk e mësuan se nga se vuante. "Na ndihmoni të shpëtojmë vajzën tonë të vetme. Kemi frikë se do e humbasim edhe atë",- pohon babai i pacientes, Festim Daullja.

Ndërsa mjekët e Pediatrisë në QSUT pohojnë se me gjithë analizat dhe ekzaminimet që i kanë bërë nuk po i vendosin dot një diagnozë. Për këtë arsye ata rekomandojnë që pacientja të dërgohet jashtë vendit, pasi këtu nuk mund të bëjnë më shumë për të.

Pacientja

Xhesikës që kur ishte 2-muajshe asnjëherë nuk i është ulur temperatura nën 38 gradë. Babai i saj shpjegon se vajza është shtruar në spital që kur filloi të kishte temperaturë të lartë në mënyrë të vazhdueshme, por askush nuk u thoshte se nga çfarë vuan.

"Vuan dhe përvëlohet nga temperatura e lartë që i rri gjithnjë 38-40 gradë. E mbajnë të shtruar me javë të tëra në spital dhe i bëjmë plazmë gjaku një herë në tre javë.

Analiza dhe ekzaminime ka bërë plot, por nuk e di askush se nga se vuan vogëlushja jonë",- pohon babai i Xhesikës, duke shtuar se mjekët i thonë ta nxjerrin jashtë vendit, por nuk ka asnjë mundësi të përballojë shpenzimet.

Sipas tij vajza është shtruar në disa pavijone të specialiteteve të ndryshme, dhjetëra mjekë e kanë vizituar dhe ka marrë lloj-lloj barnash por askush nuk di t'u thotë se çfarë ka.

Fatkeqësia

Lindja e vajzës së parë do ta gëzonte pa masë çiftin Daulli, por për fat të keq ky gëzim nuk do të zgjaste shumë. "Vajza e parë filloi të kishte temperaturë të lartë njësoj si Xhesika që kur ishte 2-muajshe.

E dërguam në spital, shpenzuam gjithë çfarë kishim për ta shëruar, por nuk u bë asgjë. Vdiq 9-muajshe pa e ditur se nga se mundohej vogëlushja jonë",- pohon Festim Daullja.

Të ndodhur në këtë situatë, atyre nuk u mbetet asgjë tjetër vetëm të bëjnë apel për ndihmë. Jeta e vogëlushes së tyre është në rrezik. "Na ndihmoni të shpëtojmë vajzën tonë të vetme. Duhet të dalë jashtë shtetit se këtu nuk kemi më shpresa. Ajo është jeta jonë",- theksuan babai dhe nëna e Xhesikës.

-----------------------------------------------------------------------------------------------

Mjekët: Duhet të dalë jashtë, nuk e dimë çfarë ka

Fëmija paraqet një gjendje fibrike të zgjatur që prej moshës 2-muajshe me një natyrë të paqartë. Megjithëse është shtruar në shumë pavijone dhe janë bërë herë pas here analiza dhe ekzaminime, ende nuk kemi arritur t'i gjejmë shkakun e temperaturës së lartë.

Kështu u shprehen mjekët e Pediatrisë së Qendrës Spitalore Universitare "Nënë Tereza" të cilët theksojnë se i shqetëson fakti se pacientes i ka vdekur edhe motra në moshën 9-muajshe me të njëjtat simptoma.

"Kështu që mendojmë se mos është diçka e trashëguar të cilën nuk arrijmë dot ta diagnostikojmë me këto mundësi që kemi këtu. Aktualisht një imunitet të ulët e ka fëmija ndoshta edhe nga fakti se po përdor shumë antibiotik",- pohojnë mjekët, duke shtuar se herë pas here kanë bërë gamaglobulinë por, meqë aktualisht nuk ka më në spital prindërit e tyre e kanë blerë vetë ose janë detyruar ta trajtojnë me plazmë.

"Edhe ne si mjekë jemi shumë të interesuar për të ditur diagnozën e saj për të kuptuar disa patologji që i hasim në praktikë, por ndonjëherë nuk arrijmë t'u vëmë dot emër. Mendojmë se duhet të trajtohet në spitalet e huaja pasi ne nuk kemi mundësi t'i vendosim një diagnozë,"- pohojnë mjekët. E.Bardhi