Kisha katolike: Berluskoni të shpjegohet për 'turpet'

Silvio Berlusconi duhet të shpjegohet "sa më shpejt që të jetë e mundur" për të gjitha pikëpyetjet e ngritura gjatë javëve të fundit lidhur me jetën e tij private, mësohet sot nga kryeartikulli i të përditshmes së Konferencës së peshkopëve të Italisë (CEI), "Avvenire".

Sipas "Avvenire"-s, është e "nevojshme të bëhet sa më shpejt që të jetë e mundur një sqarim i mjaftueshëm për të gjitha pikëpyetjet më urgjente që paraqiten jo vetëm nga kundërshtarë politikë të kryeministrit, por edhe nga një pjesë e opinionit publik që nuk e ka kundërshtuar aspak në parim".

Thirja e gazetës kryesore katolike italiane bëhet një ditë pas zbulimeve të shtypit italian lidhur me një hetim në Bari për disa festa në rezidencat e tij luksoze në shoqërinë e grave të reja që mendohet të jenë paguar për të kaluar natën në shoqërinë e kryeministrit.

Berluskoni i ka cilësuar këto informacione si "të ulëta" dhe u shpreh se ato nuk do ta pengonin për të "vazhduar punën"."Nuk ka asgjë për të sqaruar. Gjithçka është shumë e qartë: bëhet fjalë vetëm për shpifje", theksoi sot ai në adresë të shtypit italian gjatë samitit evropian të Brukselit. Këto lajme të reja vijnë pas "Noemigate", nga emri i vajzës së re, 18 vjeçe, me të cilën Silvio Berluskoni dyshohet se ka patur një lidhje, gjë që ai e përgënjeshtron zyrtarisht. Më 5 maj, e përditshmja katolike e ka treguar me gisht "dobësinë e Berluskonit për aktoret e reja në lulëzim" "Vazhdojmë të mbajmë shpresën për një kryeministër që di, me maturi, të jetë pasqyra -sa më pak e deformuar që të jetë e mundur- e shpirtit të vendit", ka deklaruar e përditshmja.