Rishikimi i testit, përgjigjja në AVA

Matura, provimi i Letërsisë dhe Gjuhës Shqipe. Ankimimi, sot afati i fundit i dorëzimit në shkolla

Në Tiranë rreth 150 maturantë kërkojnë rishikimin e testit. Përgjigjet gjatë javës së ardhshme

Në dukje interesimi i ditëve të para duket sikur ka rënë, por në brendësi të shkollave rezultatet e provimit të parë me detyrim në lëndën e Letërsisë dhe Gjuhës Shqipe, mbeten ende në qendër të bisedave.

Ndërsa kanë kaluar katër ditë, nga dita e afishimit të rezultateve, komisionet shkollore të maturës shtetërore të ngritura në shkolla vazhdojnë punën për mbledhjen e ankesave që maturantët kanë në lidhje me rezultatet që ata kanë marrë në provimin e parë.

Deri mesditën e djeshme, vetëm në Tiranë, pa përfshirë qytetet e tjera, paraqitën kërkesën për rishikim të testit rreth 150 maturantë. Në shkollën e mesme "Ismail Qemali", nëndrejtoresha e këtij institucioni tha për gazetën "Shekulli" se janë paraqitur 7 ankesa.

"Përgjithësisht maturantët që kanë kërkuar rishikimin e testit, janë ata që në provim kanë marrë notën 8 dhe që pretendojnë se kanë dhënë më shumë se ç'janë vlerësuar nga komisioni i vlerësimit të testeve". Pjesa e cila u ka ulur më shumë pikët nxënësve të mirë që pretendonin për të marrë notën 10, ka qenë eseja.

Mësuesit e Letërsisë shpjegojnë se shtjellimi i esesë ka rezultuar me pasoja në pikë për maturantët. Afati i fundit kur maturantët e pakënaqur, duhet të dorëzojnë kërkesën për rishikim të testit është dita e sotme.

"Nesër (sot) është afati i fundit kur maturantët do të dorëzojnë ankesat pranë Komisionit Shkollor të Maturës Shtetërore. Ne do t'i presim deri në orën 12:30 minuta, ndërkohë që pas kësaj ore nuk do të pranojmë asnjë ankesë", u shpreh nëndrejtoresha e shkollës "Ismail Qemali".

Mesditën e sotme të gjitha shkollat do të mbledhin ankesat dhe do t'i dërgojnë pranë drejtorive përkatëse arsimore rajonale, të cilat do t'i dërgojnë më tej në Agjencinë e Vlerësimit dhe Arritjeve të Nxënësve (AVA).

E veçanta nga vitet e kaluara është se këtë herë rishikimi i testit nuk do të ketë thjesht karakter vëzhgimi, por do të bëhet një korrigjim i plotë i testit, ku nëse maturanti rezulton se ka marrë më shumë pikë se në vlerësimin e parë, këto pikë do t'i shtohen në vlerësimin e dytë.

Maturantët që kanë kërkuar rishikimin e testit do t'i marrin përgjigjet në mesin e javës së ardhshme. Për të parë rezultatet e dala nga rishikimi i testit, ata duhet të drejtohen pranë AVA-s, e cila do të vendosë edhe për notën të cilën ata meritojnë në provimin e Letërsisë dhe Gjuhës Shqipe për Maturën Shtetërore 2009.