Dita e muzikës festa pushton rrugët e Tiranës

Me dhjetëra njerëz iu bashkuan mbrëmjen e djeshme, në një atmosferë të gëzueshme, Ditës Ndërkombëtare të Muzikës, evenimentit kulturor që u organizua për të pestin viti radhazi nga Bashkia e Tiranës.

Festimet, të cilat u shtrinë në të gjithë kryeqytetin, filluan në orën 19.30, nën ritmin e bandës frymore të bashkisë, e cila nisi performimin e saj nga Bashkia e Tiranës, për të vazhduar më tej në bulevardin "Dëshmorët e Kombit", e duartrokitur përgjatë gjithë itinerarit nga spektatorët dhe kalimtarët e shumtë në anë të rrugës.

Ngritja e siparit të festimeve shënoi edhe fillimin e mbrëmjes argëtuese në të gjitha pikat muzikore të ngritura nga Bashkia e Tiranës. Në lulishten e Këshillit të Europës, një vend i veçantë argëtimi iu la fëmijëve, të cilët kënduan dhe recituan nën tingujt fëminorë.

Sikurse u takon me meritë, fëmijët patën mundësi për gati 2 orë të shprehnin të gjithë talentin e tyre në këngë dhe poezi.

Por, nuk ishin vetëm fëmijët në festë. Në urën e Shallvareve, bashkia kishte menduar edhe për argëtimin e të rinjve, duke ideuar një skenë krejt origjinale.

Çdo i ri pati mundësi mbrëmjen e djeshme, pa u kushtëzuar nga mungesa e talentit, të performonte për një herë të vetme në jetë, duke provuar dhuntitë në këndim. Në një karaoke të improvizuar gjithkush pati shansin të këndonte.

Atmosferë krejt tjetër në sheshin e "Vëllezërve Frashëri". Orkestra e formuar nga të rinj të ardhur nga Liceu Artistik, bënë për vete me dhjetëra kalimtarë, të cilët kthyen rrugën për të dëgjuar tingujt e të rinjve të talentuar. Kulmi i të gjithë mbrëmjes ishte shfaqja, tani jo më nën petkun e politikanit, por të këngëtarit, të kryetarit të bashkisë, Edi Rama.

Së bashku me grupin "Ëest Side Family", ai këndoi përballë një publiku të gjerë, në skenën e ngritur përballë Galerisë së Arteve, himnin e fushatës elektorale të Partisë Socialiste, "Çohu", këngë e cila ngriti peshë zemrat e të gjithë të pranishmëve në shesh.

Tridhjetë e tre, ashtu si numri që mban Partia Socialiste në fletën e votimit, ishte numri i këngëtarëve që performuan mbrëmë në skenën e ngritur përballë Galerisë së Arteve. Emra të njohur si Ariela Krasniqi, Vesa Luma, "Tingulli 3", "Etno-Engjujt" e shumë të tjerë, mbajtën gjallë rininë deri në orët e vona, deri në momentin kulminant, kur në skenë u ngjit kryetari i Bashkisë së Tiranës, Edi Rama dhe grupi "West SIDE Family", të cilët kënduar së bashku këngën "Çohu". Performimi i kryebashkiakut dhe liderit të Partisë Socialiste, Edi Rama, u prit me ovacione nga të pranishmit në koncert, duke i dhënë një tjetër atmosferë koncertit