Studimi, shpenzimet e përdoruesve dhe rreziqet që sjellin ata

E.B | 26/06/2009 | Shendeti | 0 KOMENTE | SHARE | - +

Një studim i "Stop Aids" për përdoruesit e drogave tregon mbi shpenzimet e kësaj kategorie dhe sjelljet e riskut që ata kanë

Transmetimi i infeksionit HIV tek përdoruesit e drogës është tipik përmes shkëmbimit te agave apo shiringave që përdoren për injektimin e drogave ilegale. Ky është edhe qëllimi kryesor që "Stop Aids" shpërndan shiringa në terren për këtë kategori, pasi drejtori i kësaj qendre, Dr. Memo Boci, pohon se përdoruesit e drogave me injektim janë "urë lidhëse" midis transmetimit të infeksionit HIV tek grupet e tjera me risk dhe popullata në përgjithësi. Ndërkohë, ai pohon se kjo qendër ka realizuar edhe një studim në lidhje me sjelljet e kësaj kategorie, ku janë përfshirë 170 përdorues droge.

Të dhënat e këtij studimit, sipas tij, tregojnë se pjesa më e madhe e përdoruesve intravenozë të drogës janë meshkuj (rreth 91% e atyre që morën pjesë në studim) dhe mosha mesatare e fillimit të drogës me injektim është rreth 18 vjeç.

"Për sa i përket edukimit, predominojnë ata me arsim 8-vjeçar; 1/3 me arsim të mesëm dhe pak prej përdoruesve intravenozë, që marrin shërbimet e ofruara nga kjo shoqatë kanë arsim të lartë; rreth 16% e tyre aktualisht janë duke ndjekur shkollën",- pohon Boci, duke shtuar se studimi tregon që, në lidhje me punësimin, 68% e tyre raportojnë që nuk kanë një vend pune ose sapo e kanë humbur atë për shkak të marrëdhënieve të tyre me përdorimin e drogave ilegale.

Ndërsa, sa u takon shpenzimeve për të blerë mallin e përditshëm, në studim thuhet se një përdorues droge shpenzon mesatarisht 3000-3500 lekë të rinj në ditë për të blerë drogën. Arsyet e nisjes së drogës, sipas Memo Bocit, janë të ndryshme, si p.sh., i nxitur nga shokët, problemet familjare apo dëshira për ta provuar atë.

Rreth 75% e tyre e kanë nisur drogën me kanabis dhe pjesa tjetër direkt me heroinë. "Rreth 61% e tyre i shkëmbejnë shiringat e injektimit me të tjerët, duke u bërë një rrezik evident për përhapjen e infeksionit HIV.

Zakonisht, grupet e injektimit apo të shkëmbimit të shiringave janë nga 2-4 persona",- pohon Boci, duke shtuar se 64% e tyre raportojnë se kanë partner seksual, por përqindja e përdorimit të kondomit është e ulët, rreth 37% e tyre e përdorin atë në mënyrë të rregullt. E.Bardhi

3500 mijë lekë shpenzojnë përdoruesit e drogës mesatarisht në ditë

68% e përdoruesve të drogës raportojnë që nuk kanë një vend pune

75% e tyre e kanë nisur drogën me kanabis dhe pjesa tjetër direkt me heroinë

61% e përdoruesve shkëmbejnë shiringat e injektimit me njëri-tjetrin

37% e përdoruesve e përdorin drogën në mënyrë të rregullt