Kamëz, votimi mes ironisë dhe tensionit

Qendra e votimit nr.1575 në Kamëz, ishte shtëpi banimi. Pronari acarohet me gazetarët

Komisionerët e opozitës, të pafuqishëm për të ndryshuar qendrat e votimit në ambiente të duhura

Shtëpi e kthyer në qendër votimi, ku e gjithë zona ka shkelur aty për të shprehur preferencat e tyre për zgjedhjet parlamentare. Por, të zotin e shtëpisë, e bezdis prania e gazetarëve.

Ai flet me tone të ashpra sapo mëson se para shtëpisë së tij, një pjesë të së cilës e kishte kthyer në qendër votimi, ndodheshin gazetarë. Kjo ndodhi dje në qendrën e votimin nr.1575, në zonën e Kamzës, ndërsa prej saj largohej kryetari i Bashkisë së Kamzës, Xhelal Mziu.

Anëtarët Partisë Socialiste të KZAZ-zë së Kamzës pohuan se ishin ankuar që votimet të mos bëheshin në këtë ambient, por askush nuk e mori në konsideratë ankesën e tyre dhe se janë ndierë shpesh pre e kërcënimeve.

Ndërkohë, gjatë vëzhgimit në KZAZ-në e Kamzës, janë shënuar incidente në momentin që kanë filluar të dorëzohen kutitë e votimeve nga komisionerët e qendrave të votimit.

Irritimi

Dhjetëra simpatizantë të partive ishin mbledhur para qendrës së votimit nr.1575 në rrugën "Çekrez", qendër votimi kjo, e cila ndodhej brenda oborrit të shtëpisë së një banori të kësaj rruge.

I kënaqur se çdo gjë ka shkuar në rregull në këtë qendër votimi, i zoti i shtëpisë nuk e duroi dot faktin se para shtëpisë së tij ndodheshin gazetarë. "A mund ta di se për çfarë e fotografuat këtë shtëpi.

Fotografo po deshe vetëm pjesën e qendrës së votimit dhe jo derën e shtëpisë, se ndryshe ta theva aparatin", -thekson i zoti i shtëpisë. Ndërsa polici i vetëm që ndodhej në këtë qendër jo vetëm që nuk reagoi, por ishte i angazhuar me bisedat e banorëve pa u preokupuar për detyrën që duhej të kryente.

Ndërsa anëtarët e KZAZ-zë së Kamzës pohuan se nuk ka patur asnjë arsye që një qendër banimi të kthehej në qendër votimi, pasi banorët mund të votonin edhe në shkollën e zonës. "Këtë problem e kemi ngritur prej kohësh.

Por, militantët e PD-së vendosën që të kthejnë 22 subjekte private në qendra votimi dhe ne jemi ndier të kërcënuar përballë çdo kundërshtimi që kemi bërë për këtë fakt",- pohojnë anëtarët e Partisë Socialiste të KZAZ-së së Kamzës.

Incidenti

Shtyrje, fyerja dhe acarime, këto kanë qenë reagimet e komisionerëve të qendrave të votimit dhe policisë, në momentin që kutitë e votimit kanë filluar të mbërrijnë në KZAZ-në e Kamzës.

Madje, forcat e policisë lejuan futjen brenda në qendrën e votimit me pretekstin se ajo do të jepej vetëm kur të dorëzohen të gjitha kutitë e votimit. "Mos shtyni duke krijuar konfuzion dhe mos braktisni kutitë e votimit",- këto ishin udhëzimit e forcave të rendit, që ishin me dhjetëra në KZAZ-në e Kamzës.

----------------------------------------------------------------------------------------

Nënkryetari i KZAZ-zë së Kamzës përzihet nga qendra e votimit

Komisioni i qendrës së votimit 15/ 95, i lagjes nr.4 në Bathore, ka përzënë nënkryetarin e KZAZ-se së Kamzës, Altin Xhixha, në kohën që ai ka hyrë për të parë se si po shkonte procesi i votimit. Një rast ky që tregon se sa e tensionuar është dita e zgjedhjeve në këtë zonë, kur një komision i një qendre votimi përzë eprorin e tyre.

Menjëherë pas këtij incidenti të rëndë, në vendngjarje kanë mbërritur vëzhgues të OSBE-ODIHR-it, si dhe forcat e policisë, të thirrura nga nënkryetari i KZAZ-së. Por, kryetari i komisionit të kësaj qendre votimi e shpjegon ndryshe incidentin.

"Na ofendoi, pasi thirri të mbyllet qendra e votimit", - tha ai për nënkryetarin e përjashtuar. Kjo deklaratë mohohet nga Xhixha, i cili pohon se sapo ka hyrë në objekt i pajisur me mjetin e identifikimit, ai jo vetëm që është nxjerrë jashtë, por edhe është kërcënuar. Kërcënimi i dytë ndaj tij ky, pas atij të dy netëve më parë.

Ai u kërcënua nga një punonjës i Policisë së Burgjeve, ende i paidentifikuar. Për anomali në proces flet edhe kandidati socialist, Sul Cara, i cili akuzon kryetarin e Bashkisë së Kamzës se po përdor administratën për të bërë presion tek votuesit.

"Ky presion po bëhet nga punonjësit e bashkisë. Për këto katër qendra do të komunikojmë me përfaqësuesit e KZAZ-së dhe mund të tërheqim edhe komisionerët tanë", - shprehet Cara.
e. bardhi