Sondimi i fundit i Doktorit

Shqiptarët kaluan dje testin e tyre të parë historik. Ata votuan duke ruajtur qetësinë dhe duke u treguar shumë më tepër qytetarë sesa politikanët në fushatë.

Kapërcyen mbi pengesat që pushteti qendror - organizator dhe përgjegjës i procesit zgjedhor - kishte sajuar dhe sot kanë pse të krenohen: edhe pse në kushtet e një vendi në presionin e një partie-shtet, ditën të votojnë dhe të japin votën e tyre për ndryshim. Vota e tyre e shenjtë po numërohet dhe opozita na ka garantuar se ajo do të numërohet drejt. Përballë kësaj shumice qytetare, fatkeqësisht, - por jo papritur - ishte pakica ende në pushtet, që tentoi ta keqlexonte dhe ta shtrembëronte verdiktin.

E gjithë fushata e tyre u bazua në trukime që kishin për qëllim të trembnin shpirtin entuziast të votuesve shqiptarë dhe të opozitës së majtë. Dhe dita e djeshme post-votim nuk bëri përjashtim nga kjo strategji e ulët.

Ishte paralajmëruar se do të ishte një shkëndijë e vogël që do të ndriçonte sadopak rezultatin paraprak të votave që duan kohën e tyre të numërohen, por u përdor për t'i vënë flakën një procesi.

Verdikti i plotë i votuesve shqiptarë pritet të dalë sot, por frika nga përdorimi makiavelik, i exit-poll-eve nga partia në pushtet, ishte paralajmëruar shumë ditë përpara se ato të mbaheshin.

Të organizuara me "studentë", apo nga kompani të shumta, prej atyre me emra qesharakë e deri te ata që pretendojnë status serioz, ato sollën mbrëmë një produkt të çuditshëm. Mund të shërbenin për gjithçka, por jo për t'i ndihmuar kristalizimit të një rezultati paraprak votimesh.

Kryetari i PD-së, në daljen e parë dhe të fundit, dje, pas mbylljes së qendrave të votimit, u shpreh se edhe i besonte, por edhe jo rezultatet e tyre dhe iu fsheh në mënyrë të pazakontë këtij moduli të rëndësishëm të fushatës dhe ditës së zgjedhjeve. Kemi arsye të besojmë se e bëri këtë veprim për t'i lënë shesh të lirë manipulimit virtual të votës së hedhur ditën e 28 qershorit.

Fjalën e morën sonduesit e përdorur prej tij. Dikush që kishte përdorur studentë për të rrëmbyer ndonjë votë-llaf goje, tjetra duke rihedhur në eter rezultate qesharak, ndërsa një tjetër harboi totalisht, duke u bërë komike me rezultatet që ishin diametralisht të kundërta nga ato që vetë kishte nxjerrë vetëm pak ditë më parë.

Në një vend të zhvilluar dhe demokratik, sondimi i publikut është një rutinë dhe pakkush dyshon në vërtetësinë e rezultateve edhe pa e saktësuar marzhin e gabimit. Kur është fjala për zgjedhjet, në shumë prej këtyre vendeve rezultati që ato nxjerrin është ngushtësisht i saktë me rezultatet reale që dalin pas numërimit të votave.

Ata votues në këto vende, për fatin e tyre të mirë, janë 100 për qind të lirë të votojnë dhe po aq të lirë ta deklarojnë këtë votë. Por, Shqipëria, për fat të keq, është ende një vend tjetër.

Edhe dje, në një ditë që duhet të ishin të lirë për të votuar sipas bindjeve të tyre politike, shqiptarët nuk e patën këtë luks. Iu desh të luftonin me veten e tyre, me fqinjin, me shefin dhe fatin e të nesërmes së pasigurt.

Është e kuptueshme se çfarë rezultatesh sondazhi mund të marrësh prej këtyre votuesve, një pjesë e të cilëve - veçanërisht të punësuar në administratën shtetërore - ishin të detyruar gjatë gjithë fushatës të merrnin pjesë në mitingjet e PD-së në këmbim të vendit të punës.

Ky lloj votuesi, edhe në kushtet e ruajtjes së anonimatit të premtuar prej sondazhbërësit, vetëm PD-në do të artikulonte, vetëm numrin 10 do të shqiptonte.
Por, këto sondazhe shërbyen për diçka: janë një kut i saktë për shkallën e presionit që prej javësh është ushtruar mbi votuesit shqiptarë.

Ana tjetër e errët që i zhvleftëson rezultatet e këtyre sondazheve, është anësia e tyre politike dhe varësia nga ai që paguan. Ka patur alibi të shumta për t'u dalë në mbrojtje rezultateve të prodhuara prej këtyre kompanive, se ato nuk mund të prodhonin shifra të paqena, sepse kështu do të shkatërronin reputacionin e tyre dhe të ardhmen e biznesit që bëjnë.

Por, përballë këtij meraku ka qenë tundimi prej organizatorit të zgjedhjeve, Kryeministrit Berisha. Ai nuk e ka fshehur asnjëherë se do të paguante çdo çmim për të fituar një mandat të dytë qeverisës.

Për tre muajt e fundit, vuri në dispozicion buxhetin e shtetit dhe fondin rezervë të tij, gjithë burimet njerëzore dhe materiale, logjistikën dhe premtimet më të bujshme për t'ia arritur këtij qëllimi. Ndaj, nuk kishte pse të mos hidhte edhe disa qindarka më tepër.

Sondimi i fundit i Doktorit mbi votën e shqiptarëve, në fund fare u zhvleftësua prej vetë atij. Nëse sondazhet nuk do të ishin prodhim i makthit të tij për të marrë fitore hipotetike dhe do të kishin sadopak përqindje vërtetësie, dje pasdite, shqiptarët do të kishin parë në ballkonin e PD-së, njeriun që po kështu festonte që në mesditën e 26 majit 1996 vjedhjen e zgjedhjeve.

Fakti që ai nuk ka dalë, por ka nxjerrë rrugëve vetëm makinat e militantëve që djegin karburant dhe bateri, tregon se po vëzhgon me dëshpërim rezultatin e diversionit të fundit, ndaj votës së shqiptarëve. Dhe vota e shqiptarëve shpresojmë të mos ketë asnjë lidhje me sondimin e një politikani në largim.