Apeli ish-zv\ministri, Nikolin Jaku, i pafajshëm

Gjykata Shpalli dje të pafajshëm edhe ish- shefin e prokurimeve të Ministrisë së Transporteve, Skënder Bokçiun

Ndaj ish- zyrtarëve të tjerë të Transporteve dhe të Rrugëve, të akuzuar për abuzime nuk ndryshuan masat e dënimeve

TIRANË- Gjykata e Apelit në kryeqytet, pushon akuzat ndaj ish- zv\ministrit të Transporteve, Nikolin Jaku, dhe ish-shefin e prokurimeve pranë këtij dikasteri, Bashkim Kamberi.

Treshja gjykuese e kryesuar nga gjyqtari Lefter Jahja dhe anëtarët Dalip Bushi e Rrahman Qinami, që pasi kanë dëgjuar pretendimet e palëve në proces, konkluzionet e prokurorisë dhe pretendimet e mbrojtjes, vendosën pushimin e akuzave dhe masën e dënimit tashmë të vuajtur ndaj shtetasve Nikolin Jaku dhe Bashkim Kamberi.

Sipas dispozitivit të lexuar për 30 sekonda nga kryesuesi, nuk bëhet i ditur arsyetimi i pushimit të akuzave ndaj ish-zv\ministrit Jaku dhe ish-shefit të prokurimeve Kamberi, por urdhërohet që ata të "zhvishen" nga akuzat.

Ndërkohë që në maj Gjykata e Shkallës së Parë në kryeqytet deklaroi fajtor Nikolin Jakun duke e dënuar me 12 muaj e 20 ditë burg dhe 500 mijë lekë gjobë, ndërsa, ish-shefi i prokurimeve është dënuar vetëm me 12 muaj e 20 ditë heqje lirie.

Mësohet se me pushimin e akuzave, dy ish-zyrtarëve të lartë të Ministrisë së Transporteve, Jaku e Kamberi i lind e drejta t'i drejtohen togave të zeza duke kërkuar kompensimin me lekë të ditëve të burgut, të cilët kanë qëndruar të izoluar në qeli me nga 12 muaj e 20 ditë burg secili.

Ndërkaq, kanë qenë përfaqësuesit e akuzës, të cilët nuk ishin dakord me këtë masë dënimi të dhënë nga Gjykata e Shkallës së Parë të cilët e kanë apeluar çështjen, duke kërkuar gjithashtu një masë dënimi më të madh se sa kishin dhënë togat e zeza në maj të 2008.

Sipas pretencës së prokurorisë së lexuar në Apel, mësohet se për të pandehurin Nikolin Jaku është kërkuar ndryshimi i masës së dënimit, nga 1 vit e 20 ditë burg e 500 mijë lekë të bëhet në 2 vite burg dhe 1.3 milionë lekë gjobë.

Për të pandehurin Ilirjan Berzani u kërkua dënimi me 3 vjet burg e 1.3 milionë lekë lekë gjobë nga 2 vjet burg e 2.6 milionë lekë gjobë. Për të pandehurin Bashkim Kamberi u kërkua dënimi me 14 muaj burg e 250 mijë lekë gjobë nga 1 vit e 20 ditë burg të dhënë nga Shkalla e Parë.

Por, nuk kanë qenë të kësaj mendjeje, tre gjyqtarët të cilët jo vetëm që nuk ngritën masat e dënimit për të pandehurit, por vendosen edhe pushimin e akuzave ndaj dy prej tre të pandehurve të cilët ishin dënuar në Gjykatën e Shkallës së Parë në kryeqytet.

Gjithashtu, gjatë mesditës së djeshme, treshja gjykuese e kësaj gjykate ka vendosur të lërë në fuqi vendimin e Gjykatës së Shkallës së Parë në kryeqytet dhënë më 29 maj 2008, ku zyrtarët e tjerë të dikasterit të Ministrisë së Transporteve u dënuan me burg. Për ish-drejtorin e Drejtorisë së Përgjithshme të Rrugëve, Ilirjan Berzani, dhe dy ish-zyrtarët e tjerë të kësaj ministrie Xhevahir Muçogllavën e Arian Shetin, si dhe dy biznesmenët Skënder Bokçiu dhe Isuf Ukperaj, Gjykata e Apelit la në fuqi vendimin e Gjykatës së Shkallës së Parë, të dënuar me burg dhe gjoba të ndryshme.

Sipas vendimit të gjykatës, ish-zyrtarët e Ministrisë së Transporteve dhe Drejtorisë së Rrugëve si dhe dy biznesmenët, në bashkëpunim me njëri-tjetrin kanë abuzuar në lidhje me paracaktimin e katër fituesve të tenderëve për ndërtimin e katër segmenteve rrugore, që zhvilloheshin pranë Ministrisë së Transporteve, duke përvetësuar nga fituesit 10 % e vlerës së çdo tenderi.

VENDIMI I SHKALLËS SË PARË

Nikolin Jaka, me 1 vit e 20 ditë burg dhe 500 mijë lekë gjobë
Bashkim Kamberi, me 1 vit e 20 ditë burg
Ilirjan Berzani, me 2 vjet burg dhe 2.6 milionë lekë gjobë
Arjan Sheti, me 1 vit e 4 muaj burg dhe 400 mijë lekë gjobë
Xhevahir Muçogllava, me 1 vit burg, u lirua në gjyq
Isuf Ukperaj, me 1 vit e 20 ditë burg dhe 600 mijë lekë gjobë
Skënder Bokçiu, me 1 vit e 20 ditë burg dhe 600 mijë lekë gjobë