Kapen me armë e heroinë, tre në pranga

KORÇË- Tre të rinj kanë përfunduar në pranga, pasi u kapën me një sasi lënde narkotike të dyshuar si heroinë, armë zjarri dhe municione luftarake.
Lajmi bëhet i ditur nga policia e Korçës, e cila sqaron se ndalimi i tyre është bërë në kuadër të një operacioni të koduar " Kutia e parfumit".
Burime zyrtare të kësaj policie, nëpërmjet njoftimit për shtyp, bënë të ditur se nga ky operacion u kap në flagrancë shtetasi S.Ll, të cilit në momentin e ndalimit iu gjet dhe sekuestrua një sasi prej 120 gram lënde narkotike e ngjashme me atë të llojit heroinë, si dhe një peshore elektronike. Policia tha se në momentin e realizimit të këtij operacioni, ka qenë i pranishëm edhe shtetasi Vasajan Naum, 18 vjeç nga qyteti i Korçës, të cilit ju gjet dhe ju sekuestrua në banesë një armë automatike dhe një sasi fishekësh. Nga hetimet e policisë, rezultoi se sasinë e lëndës narkotike prej 120 gram, shtetasi S.Ll e kishte marrë prej 22 vjeçarit Mikel Çekrezi, i cili u arrestua për kryerjen e veprës penale
"Prodhim dhe shitje e lëndëve narkotike". Ndërsa shtetasi Vasjan Naum, u arrestua nga policia me akuzën e " mbajtjes pa leje të armëve dhe municionit luftarak". Të tre këta persona, do të hetohen më tej në gjendje arresti.