Shqiptarët, pushime të varfra

TIRANE - Pushime të paplanifikuara dhe jo luksoze. Madje ka edhe nga ta që i shohin agjencitë turistike vetëm nga vitrinat ose thjesht marrin mundimin dhe pyesin për çmimet dhe nuk duken më kurrë. Në një vëzhgim që bëri gazeta në agjencitë turistike më në emër të kryeqytetit, të gjithë menaxherët e turizmit pohojnë se, krahasuar me një vit më parë, kërkesat e shqiptarëve për të bërë pushime jashtë vendit, kanë ranë shumë. "Për fat të keq, kjo nuk lidhet me mungesën e dëshirës së shqiptarëve për të bërë pushime jashtë vendit, por lidhet drejtpërdrejt me krizën ekonomike. Pra, tani bëhen më pak pushime dhe ato janë të planifikuara në vendet më të lira",-shpjegon Anisa Lekgjonaj, menaxhere turizmi e njërës nga agjencitë turistike më të mëdha në vend. Të njëjtin mendim me të ndjejnë edhe kolegët e saj, të cilët ndeshen çdo ditë në pakësimin e klientëve që duan të pushojnë jashtë vendit.
Kërkesat
Vitrina që të ofrojnë pushime në çdo cep të botës. Hotele me 3 yje, 4 yje edhe me 5 yje dhe lloj-lloj shërbimesh në vende përrallore, ku përfshihet çdo gjë. Kjo është panorama që të ofrohet në agjencitë turistike më prestigjioze të vendit, por, me sa duket, këto po mbeten vetëm një ëndërr për shqiptarët, të cilët po varfërohen çdo ditë e më shumë. Këtë e vërtetojnë agjencitë turistike, të cilat ndonëse po ofrojnë lloj-lloj ofertash, përsëri klientët nuk po mundin t'i shijojnë dot. "Kriza ekonomike po ndikon shumë në uljen e kërkesave të klientëve për të marrë pushime jashtë vendit. Mund të them se këto kërkesa kanë rënë me rreth 20 për qind krahasuar me një vit më parë",- pohon menaxherja e turizmit, Anisa Lekgjonaj. Ndërkohë edhe kolegët e saj të agjencive që ofrojnë pushime turistike, pohojnë të njëjtin problem. "Në fakt, puna ka rënë shumë dhe kjo po e dëmton biznesin tonë. Njerëzit nuk po mundin të përballojnë shpenzimet e pushimeve, qoftë edhe njëjavore jashtë vendit",- pohon njëri nga pronarët e agjencive turistike.
Cilësia
Nëse vendosin të marrin pushimet për jashtë vendit, tashmë nuk do kërkojnë hotelet më luksoze si një vit më parë, por "kënaqen" edhe me variantet më ekonomike të mundshme. "Tashmë kërkesat janë më të larta për hotele me tre yje dhe jo si më parë që vendosej për pushime luksi në hotele me katër dhe me pesë yje. Pra, në një farë mënyre, mund të them se pushimet e shqiptarëve janë më të varfra se një vit më parë, pasi zgjedhjet e tyre janë pikërisht për vendet më të lira",- shpjegon agjentja e turizmit, Anisa Lekgjonaj. Ndërkohë, këto agjenci pohojnë gjithashtu se, pikërisht Turqia dhe Sharm El Sheik janë më të kërkuarat, pasi këto janë më të lirat dhe nuk nxjerrin probleme për vizat e pushuesve. Megjithatë, për pjesën më të madhe të popullsisë pushimet jashtë vendit mbeten një ëndërr që nuk po e prekin dot. "Ka plot persona që vijnë dhe pyesin për çmimet e pushimeve dhe nuk duken më kurrë në agjenci dhe kjo jo se nuk duan, por nuk kanë mundësi të pushojnë aty ku duan",- pohon Anisa Lekgjonaj.

Vendet e preferuara i shijojnë vetëm biznesmenët

Pushimet në vendet e preferuara dhe të shtrenjta duket që mund t'i shijojnë vetëm biznesmenët apo dikush tjetër, që gëzon statusin e politikanit apo të artit. Askush tjetër nuk ka mundur të prekë pushimet në Spanjë, ishujt e Greqisë apo diku tjetër, ku ëndrra për luks, qoftë edhe për 4 ditë, mbetet e parealizueshme. Sipas menaxherëve të turizmit, kërkesat për pushime të tilla janë shumë të pakta, madje numërohen me gishta. "Kuptohen arsyet. Së pari, janë shumë të shtrenjta dhe jo gjithkush mund t'i përballojë. Ose më saktë, pakkush i përballon. Pos kësaj, për pushimet në këto vende, si në Paris, Greqi, Spanjë apo në vendet perëndimore, është vështirë të sigurohet vizë",- pohon menaxherja e turizmit, Anisa Lekgjonaj. Kështu pjesa më e madhe e popullsisë vazhdon të jetë larg ëndrrës për të siguruar pushime aty ku i dëshirojnë.

Fenomeni, pushime të paplanifikuara

Nëse më parë njerëzit i planifikonin pushimet, të paktën 2 muaj më parë, tashmë ndodh ndryshe: ata trokasin vetëm një ditë apo dy ditë më parë në dyert e agjencive turistike për të planifikuar pushimet. "Këtë vit është e habitshme, se njerëzit vijnë pothuajse në momentin e fundit dhe vendosin për pushimet. Më parë nuk vihej re shumë ky fenomen. Pra, mund të themi se tashmë po ndeshemi edhe me pushues që nuk i planifikojnë më parë pushimet",- pohon Anisa Lekgjonaj, menaxhere në një nga agjencitë më të mëdha të vendit.