Asgjësohen 267 rrënjë bimë narkotike

VLORË - Policia e Vlorës ka rinisur aksionin kundër narkotikëve në fshatra të lumit të Vlorës. Siç bëjnë me dije burime zyrtare, në bazë të informacioneve të marra në rrugë operative është kryer një aksion me bazë të gjerë në disa fshatra të lumit të Vlorës për gjetjen dhe shkatërrimin e bimës narkotike, të mbjella në këto zona. Nga kontrolli i ushtruar në fshatin Vllahinë të rrethit të Vlorës janë shkatërruar 110 rrënjë bimë narkotike, në fshatin Armen 37 dhe në fshatin Velcë 120 rrënjë bimë narkotike kanabis sativa, të mbjella në sipërfaqe pa pronar. Pas shkatërrimit të sasisë së bimës narkotike, policia po punon për identifikimin e personave që kanë mbjellë bimën narkotike dhe vënien para ligjit të personave përgjegjës, të akuzuar për kultivim të bimës narkotike.