Fitorja e Gjergj Elez Berishës ndaj Bajlozit

- Hë o Hysni, si e bëre gjumin mbrëmë?
- Ja ashtu, si e di ti, me ëndrra.
- Pa hë, ça pe mbrëmë?
- M'u bë sikur një njeri i keq, për t'i prishur imazhin Doktorit, doli nga deti tamam si Bajloz edhe ulërinte: "Unë jam Berisha i zi, i dalë prej detit, Sali Xhan Xhonivani, edhe sikur njerëzit u pataksën dhe nuk gjenin vrimë ku të futeshin.
- Po pastaj, ç'ndodhi?
- Po ja, sikur ulërinte ky që do u mblidhte tokën përsëri shqiptarëve se nuk po e punonin dhe do ia jepte një shokut të tij Bajloz nga Serbia, që e quanin Fazlli Xhan Zhonaviç, me një dollar, edhe pastaj do ia blinin përsëri shqiptarët këtij me valutë.
- Mos more!!
- Pastaj sikur Berisha i zi i dalë prej detit ulërinte se donte një kuti me vota nga çdo shtëpi. Edhe mos të kalonte njeri në kufi, edhe në det mos të lahej njeri veç tij, e mos të lundronte asnjë, as me kamerdare.
- Mos more!
- Populli e merrte me të mirë edhe këndonte: "Bajlozi është i mirë, do luks edhe para, një gjë kërkon ai, të jetë në qeveri", deri sa e zinte e gjumi bajlozin. Edhe sikur shqiptarët, pasi e vunë në gjumë Bajlozin, vajtën e kërkonin Gjergj Elez Berishën.
- Po e gjetën apo jo?
- Ca thoshin që Gjergj Elez Berisha ishte duke inauguruar rrugë edhe priste shirita me gërshërë e me brekë plazhi dhe e gjetën më në fund. I thanë se ka dalë një Bajloz që thotë se është Saliu i zi i dalë prej detit. "Mos more, - thotë Gjergji - e ka bërë për të më diskretituar mua, po mos u merakosni se do t'ia tregoj vendin. Megjithëse jam i plagosur me nëntë plagë, unë ju garantoj juve se do e mund edhe atë bajloz që del e ulërin me emrin tim". Edhe populli filloi të merrte pakëz frymë. "Po me këto plagë që ke ti o Gjergj Elez Berisha, zor se e mund dot atë përbindësh, po na trego ku i ke marrë gjithë këto plagë?". Edhe sikur Gjergji u ul edhe i tregonte popullit të tij plagët e shumta: "Ja, kjo është plaga e parë në zgjedhjet lokale të '92-shit, plaga e dytë nga referendumi i Kushtetutës, plaga e tretë nga zgjedhjet e '96-ës, plaga e katërt kur me zunë piramidat nën vete, plaga e pestë kur i dhashë armë popullit, plaga e gjashtë kur luftova 8 vjet në opozitë, plagën e shtatë ma shkaktoi pa dashje miku im serb Fazlliu, plagën e tetë ma shkaktoi Mediu në betejën e Gërdecit, plaga e nëntë qe në këto zgjedhjet e fundit". "E po mirë o Gjergj, do e mundësh tani atë Berishën e zi e të dalë prej detit, që po prish emrin e mirë që ke vënë ti në këtë truall, apo do na lësh në dorë të tij"?. "Pa dyshim - u përgjigj Gjergji, - unë do e thyej edhe këtë rekord personal". Edhe sikur e ngritën Gjergj Elez Berishën njerëzit krah e kofshë ashtu me plagë në gjithë trupin edhe e çuan përballë me Bajlozin. "Kush je ti, - i thotë Gjergj Elez Berisha - që tallesh me emrin tim dhe kërkon të frikësosh popullin tim?". "Unë jam Berisha i zi, i dalë prej detit" - përgjigjet ky tjetri. "Më trego letërnjoftimin e ri biometrik", - i thotë Gjergj Elez Berisha! "Nuk e kam, se nuk më pajisi Ministria jote e Brendshme", - përgjigjet tjetri". "Ky është falsitet që kërkon të errësojë arritjet e mia, nejse, pak rëndësi ka kjo, të ftoj në dyluftim dhe dije që je i vrarë". "Po ti je gjithë plagë o lumëmadh!" "S'ka problem, kështu kam qenë që nga '90-a e këtej, por gjithmonë kam fituar". "Po deshe ik e mjekohu edhe hajde ndeshemi pastaj," - i thotë ky tjetri. "Nuk ka ilaçe në spitale, se e ka bërë Godoleshka lesh e li, po hajde se unë jam doktor vetë". "E mirë, me se do dyluftojmë"? - pyet tjetri. "Unë me këto gërshërët që kam varur këtu në brekët e plazhit, ti merr çfarë arme të duash". "Okay, - tha ky, unë po marr Topuzin". Edhe m'u bë sikur populli ndiqte i tmerruar si do i vinte filli liderit të tij. "Qëllo ti i pari", - tha Gjergj Elez Berisha". Mori shenjë ai tjetri edhe e flaku topuzin. Shtatë pashë u ngul topuzi, shtatë pashë u ngrit tymi, edhe kur u largua pluhuri, populli shikonte që Gjergj Elez Berisha me gërshërë në dorë ndiqte Saliun e zi të dalë prej detit, që ia kishte mbathur nga sytë këmbët. Edhe m'u bë sikur Bajlozi u fut në det edhe bridhte më këmbë në ujë, po Berisha nuk i ndahej nga pas. Populli brohoriste i gëzuar tani edhe të gjithë thoshin se tani s'ka ku vete Bajlozi, pasi Berisha rri tre orë në ujë edhe do ta zërë se s'bën.
- Po pastaj ç'ndodhi?
- Pastaj m'u bë sikur Bajlozin e shtypi Ilir Meta, që po vinte me jaht për të takuar Gjergj Elez Berishën.
- Oh, paska vajtur bukur fare, ça koincidence more!
- Edhe vetë e do kishte zënë Gjergj Elez Berisha, po Meta sa i shkurtoi punë.
- Bravo i qoftë!