Konsultat e maturës fillojnë me shkollën

Mund të duket paksa herët, por jo për Ministrinë e Arsimit. Menjëherë sapo të fillojë viti shkollor dhe të përmbyllet faza e pranimeve në universitete, MASH-i do të urdhërojë nisjen e përgatitjeve për maturën e ardhshme. Në muajin tetor, nxënësit e viteve të katërta do të fillojnë fazën e konsultave, si edhe do të njihen me programet e orientimit. Këtë vit, në gjimnaze do të rikthehen pas një viti mungesë, mësimi në vitin e parë, ose siç njihet ndryshe, në klasat e dhjeta. Në total, në të gjithë republikën do të ulen për herë të parë në bankat e gjimnazeve dhe shkollave profesionale rreth 40 mijë nxënës, të cilët do t'u bashkëngjiten kolegëve të tyre në vitet e treta dhe të katërta. Po kështu, në vitin e ri shkollor, do të mungojë viti i dytë gjimnaz, si pasojë e ndërrimit të sistemit nga 4 në 3-vjeçar, ndërkohë që, në total, numri i mësuesve në rang vendi në arsimin parauniversitar, do të jetë 36 mijë.