Sarandë, digjen 89 ha sipërfaqe

SARANDË- Një tjetër rast zjarri është shënuar në rrethin e Sarandës gjatë ditës së djeshme. Për të tretën herë radhazi, komuna e Livadhjasë është prekur këtë verë nga vatrat e zjarrit që kanë shkaktuar dëme të konsiderueshme. Ka qenë ora 18:00 e mbrëmjes së të mërkurës, kur një vatër zjarri është evidentuar në fshatin Qesarakë të kësaj komune, rreth 20 km larg qytetit të Sarandës. Të ndihmuara edhe nga era, flakët e zjarrit janë përhapur me shpejtësi të madhe duke përfshirë një sipërfaqe të konsiderueshme. Në vendngjarje, menjëherë pas marrjes së njoftimit kanë mbërritur 3 automjete dhe efektivë të repartit zjarrëfikës, të cilët të ndihmuar edhe nga banorët kanë punuar edhe në orët e vona të natës për lokalizimin e flakëve, të cilat vazhdonin të përhapeshin me shpejtësi. Informacionet e marra tregojnë se janë përpirë nga flakët rreth 170 rrënjë ulliri shekullorë, si dhe 89 hektarë sipërfaqe kullotë, ndërsa tre banesa të këtij fshati janë seriozisht të rrezikuara për t'u djegur. Gjatë kësaj vere, në komunën Livadhja të rrethit të Sarandës në tre raste zjarresh janë djegur plotësisht 700 rrënjë ullinj dhe 130 hektarë kullotë, ndërsa për asnjë rast nuk ka ndonjë autor të dyshuar apo të ndaluar.