Shteti iu merr sindikatave kampet e pushimit

TIRANË- Qeveria vendos të rishtetëzojë të gjitha pronat e ish-bashkimeve profesionale, të cilat në vitin 1992 me anë të një dekreti të presidentit Berisha, kishin kaluar në pronësi të sindikatave. Në fjalën e tij në lidhje me këtë çështje, Kryeministri Berisha kërkoi që të gjitha pronat e ish-bashkimeve profesionale, të cilat janë resortet turistike më të mira të vendit, të cilat sipas tij aktualisht nuk janë në pronësi të askujt, të shndërrohen në shoqëri aksionare me pronar shtetin.

Nisma e qeverisë përfshin një sërë shtëpish pushimi, shtëpi kulture, parqe sportive, biblioteka, salla mbledhjesh, ndërtesa shkollimi, makineri, pajisje etj., në të gjithë territorin e vendit që në qershor të vitit 1992, kryeminstri i sotshëm dhe Presidenti në detyrë në atë periudhë, Sali Berisha, ua kishte kaluar në pronësi sindikatave me qëllim shfrytëzimin nga këto të fundit. Ky dekret u lëshua me kusht që gjatë shfrytëzimit sindikatat të mos ndryshonin destinacionin fillestar të pronave të marra duke i shitur apo dhënë me qira për periudha me afat të gjatë ndaj palëve të treta. Megjithëse kishte një dekret të presidentit për arsye ende të paqarta ai nuk u miratua nga Kuvendi, ndërsa të gjitha resurset e mësipërme kaluan nën administrimin e sindikatave. Por, sipas deklaratave të djeshme të Kryeministrit, për arsye se nuk ka kaluar në kuvend, dekreti me nr.204, datë 5.6.1992 nuk është i vlefshëm dhe pronari i vetëm i pronave në fjalë që njihet është shteti shqiptar. "Në funksion të Presidentit të Republikës, në vitin 1992, në mënyrë që t'i jepja pavarësi ekonomike sindikatave, dekretova kalimin në pronësi të tyre të të gjitha pronave të ish- bashkimeve profesionale. Ky dekret, në mënyrën më të pakonceptueshme, nuk është votuar në parlament. Faktikisht, ky dekret nuk ka fuqi. Me mosvotimin e dekretit në parlament ato janë pasuri të askujt, në kohën kur ato ishin resortet më të mira turistike të vendit",- tha ai. Më tej Kryeministri sqaroi se kjo nismë merret për t'i shpëtuar abuzimit dhe pasi të ketë bërë rikonstruksionin e plotë, shteti do t'i shesë aksionet e tyre. "Që në momentin që ato do të rindërtohen, shteti është i gatshëm t'i shesë aksionet dhe të vazhdojnë të tjerët. Përndryshe, nëse nuk do të mos jetë shteti i pranishëm, do të vazhdojë bixhozi me këto pasuri, ashtu si ka vazhduar gjatë gjithë kohës",- tha ai duke shtuar se në lidhje me këtë është marrë edhe miratimi i disa përfaqësuesve të rëndësishëm të sindikatave, pasi edhe këta të fundit e kanë kuptuar se aty janë zhvilluar procese tërësisht të papranueshme

Me kalimin në pronësi të sindikatave, një pjesë e mirë e tyre në qytete të ndryshme të vendit, si shtëpitë e pushimit, parqet sportive, ndërtesat e shkollimit, etj., u lëshuan me qira ose u shitën ndaj palëve të treta. Këta të fundit investuan shuma të konsiderueshme mbi këto prona për t'i përshtatur ato me kërkesat e tregut. Ndërsa, ende nuk është bërë e ditur se cili do të jetë fati i këtyre investitorëve, të cilët kanë investuatr mbi një numër ish-kampe pushimi, parqe sportive apo ambiente të tjera në të gjithë territorin e vendit.

Procesi i kalimit tek shteti

Projektligji për shtetëzimin e të gjitha pronave që në fillim të viteve 90-të i ishin kaluar në pronësi të sindikatave është përpiluar duke shfuqizuar dekretin e presidentit në detyre të asaj periudhe, Sali Berisha. Është pikërisht neni tre i këtij projekligji në të cilin shprehet qartësisht në lidhje me këtë çështje. Sipas tij, çdo marrëdhënie detyrimi ndërmjet sindikatës në cilësinë e kreditorit, një pale të tretë i cili është investitori dhe shtetit, zgjidhet në favor të këtij të fundit. Identifikimi i pronave të luajtshme dhe të paluajtshme të sindikatave do të bëhet nga Agjencia e Inventarizimit dhe Transferimit të Pronave Publike. Ky proces duhet të përfundojë brenda tre muajve nga data e hyrjes në fuqi të këtij projektligji ndërsa për të gjithë procesin do të raportojë para Këshillit të Ministrave. Nga ana tjetër, brenda një afati kohor 60 ditë nga marrja e të dhënave, qeveria miraton fondin e pronave të paluajtshme të cilat vihen në dispozicion për kompensim fizik ndaj pronarëve sipas ligjit nr.9235, datë 29.07.2004, "Për kthimin dhe kompensimin e pronës" dhe i ve në dispozicion të Agjencisë së Kthimit dhe të Kompensimit të Pronave.