"Cila qeveri në planet, nxiton të falimentojë bizneset e vendit të saj?!!"

Letër e nënshkruar: Artion Ikonomi, Student UK, Tiranë | 04/09/2009 | Letrat e lexuesve | 1 KOMENT | SHARE | - +

Është qesharake që qeveria e një vendi të shpallë lista me "biznese të falimentuara". Por a është vetëm qesharake? Ku fle lepuri? Ç'është kjo qeveri në Europë që nxiton të falimentojë bizneset e vendit të saj, ndërkohë që gjithë qeveritë e planetit po bëjnë të kundërtën?

Përse në debatet televizive merreni me politikën më the-të thashë, dhe nuk merreni me vendimet, shkaqet dhe pasojat e politikës? Pse nuk shtrohet kjo pyetje: Si mund të shpallë një qeveri dështim të biznesit, kur duhet të bëjë të kundërtën??

Dështimi i biznesit, sidomos i biznesit të madh, edhe sikur të ndodhë realisht, është treguesi nr. 1 i dështimit total të qeverisë së një vendi që e quan veten "në ndërtim të kapitalizmit dhe të tregut të lirë".

Kjo tregon që kemi të bëjmë me një qeveri të ngritur me mendësi komplet bolshevike dhe ish-komuniste! Fushata e kaluar karakterizohej nga slogane komplet populiste, tipike komuniste si, "do luftojmë të pasurit", dhe vërtet këtë po bëjnë.

Këta bolshevikë nuk e kuptojnë që janë bizneset e mëdha që mbajnë ekonominë kapitaliste të një vendi, dhe në çdo vend të konsoliduar kapitalist, shteti dhe qeveria jo vetëm që janë shumë rigoroze në zbatimin e ligjeve për mbrojtjen dhe stimulimin e mëtejshëm të tyre, por dhe për rast të një krize dhe rreziku falimentimi, merr masa drastike në favor të mbrojtjes së tyre dhe jo e kundërta.

Fakti që një qeveri nxiton "të falimentojë" 27 biznese të mëdha, tregon qartë jo vetëm shkallën e tmerrshme të dështimit të saj, por nuk është kaq naive çështja. Kjo tregon që, mbi të gjitha, ky nxitim lidhet me qëllime pothuajse personale, dhe këto janë synimi i hedhjes dhe kontrollit në dorë të tyre të çdo aspekti biznesi, të zëvendësimit artificial të tyre me biznese te tjera të mëdha, por që do të jenë drejtpërdrejt të lidhur me fijet e qeveritarëve të sotëm.

Propaganda bombastike se në Shqipëri po u favorizokan loja e ndershme e tregut dhe aktiviteti kundrejt rregullave të tregut të biznesmenëve, janë një bllof i madh, përpara këtij fakti bombë!

Në Shqipëri jo vetëm që nuk po stimulohet tregu i lirë, por përkundrazi, po ushtrohet frikë dhe dhunë ndaj tij! Tregu në çdo aspekt të tij, tani më shumë se kurrë, po kalon në duart e vetëm një klani të ngushtë. Deri tani është bërë çdo gjë e mundur që çdo pasuri shqiptare, prona, bregdete, biznese, të kalojnë në duart e një rrethi të ngushtë që në qendër kanë familjen Berisha!!

Di që Shqipëria ka njerëz shumë të zotë dhe të zgjuar, po ashtu zyra e biznesit të madh ka njerëz shumë të zgjuar, dhe pres që me këtë rast ata të veprojnë duke iu drejtuar gjykatave ndërkombëtare për të drejtat e njeriut apo aktivitetit juridik. Ta bëjnë këtë qeveri bolshevike të kuptojë që me këto që bën, në fakt, është duke i bërë gola vetes!