Pak më shumë mirënjohje!

Prej kohësh dëgjojmë të flitet e të shkruhet në media për një debat, i cili gjithmonë degjeneron në mënyrën më banale të mundshme, zhvilluar mes dy kampesh; Përfaqësuesit të universiteteve private dhe atyre të Universitetit Publik.

Gati- gati përngjan me një duel, që në fakt as nuk është duel, për shkak të pabarazisë institucionale. Duket sikur lufta bëhet për tre kondicionerë e gjysëm, 7 tabela xhami ku varen njoftimet, 16 banka e ca karrike të shkarravitura më pak, apo për erën e banjos që mund të vijë në auditore, që për hir të së vërtetës, është e tmerrshme ta dëgjosh si diskutim në mbrëmje, teksa ha darkë, në një panel intelektualësh të sotëm apo të atyre që mund të vijnë nesër.

Nuk jam një ithtare e sektorit publik, (madje në 'fashion'-in e universiteteve private për të ofruar bursa studimi për njerëzit e medias, kam qenë disa herë e përfshirë në listën e ofertave), por standarti material i univeristeteve private nuk mund të cënojë ende historinë, ndoshta jo qindra vjeçare të Univeristetit të Tiranës, por sigurisht shumë më të gjatë se tradita, jo më shumë se pesw vjeçare e universiteteve private.

Ka gjykime vërtet "Donkishoteske" nga disa përfaqësues të universiteteve private, të cilët kanë studiuar në auditoret e Universitetit të Tiranës, (ku edhe mund të jenë emëruar pedagogë). Nuk kanë as minimumin e moralit, për t'ju falur nderës universitetit që i rriti e i gatiti. Jo vetëm ata, por produkt i Universitetit Publik, jo domosdoshmërisht vetëm i Tiranës, janë sot presidentët, kryeministrat, ministrat, kryetarët e bashkive, të opozitave, drejtorëve të drejtorive, mësuesve...të cilët na qeverisin e të cilëve ne iu referohemi.

Sjellje dhe komunikim të tillë kanë sidomos pedagogët e rinj (se të vjetrit e kanë bërë 'stazhin" në Universitetin Publik dhe nuk iu mungon shprehja e mirënjohjes, qoftë asaj institucionale, qoftë asaj profesionale midis kolegësh), por ndonjëherë edhe investitorë e aksionerë në universitetet private.

Disa nga këta të fundit bëjnë mirë që përpara se tu hyjnë dueleve, të përmirësojnë kurikulat sepse në afro 40 prej tyre ofrojnë ekonomistë, juristë dhe punonjës të shkencave sociale me lopatë. Për të mos folur pastaj për "gangrenën", që e dimë të gjithë: shitjen e diplomave, regjistrimin e menjëhershëm në vit të dytë apo të tretë, rezultatet e shkëlqyera në provime apo nivelin e konkurrencës më pak se zero.

I përkas një brezi që e urren monopolin, pra nuk jam që Universiteti Shtetëror Publik, të jetë i vetmi institucion për arsimin e lartë, por ama kjo nuk është arsye për të pranuar matrapazët, përfituesit oportunistë pa skrupuj që shfrytëzojnë çdo mangësi të ligjit e të rregullave për të nxjerrë përfitime të pallogaritshme në dëm të cilësisë së të rinjve që duan të diplomohen.

Studentët e palodhur, përpjekja e të cilëve duhet nderuar në çdo moment, nuk mund të pranojnë dot që në përfundim të studimeve të jenë të barabartë me ish- shokë të gjimnazit që në orë të Filozofisë përtypnin fara luledielli, në matematikë bënin raketa dhe varka prej letre, apo më keq akoma lëshonin flokët e gjatë, që në veshë të mos u diktoheshin kufjet e MP3

.
Universitete private duhen çmuar për mënyrën se si rekrutojnë profesorët e rinj, të diplomuar e përgatitur në Perëndim; universitetet private duhen çmuar për standartet e kushteve të bazës materiale, por nuk mund të shquhen për vigjilencën ndaj standarteve të kontigjentit të pranuar në mjediset e tyre; mjaft të përmendim përvojën: Kush nuk fiton në Universitetin e Tiranës, ka planin B, universitetin privat.

Kurrë nuk ka qenë plan parësor univeristeti privat, përjashto rastet kur "çuni apo goca e babit me lekë", janë të ndërgjegjshëm që në krye që nuk 'e hanë' dot Universitetin Publik.

Ndoshta do qe mirë, që disa universiteteve, njëlloj si hoteleve në vendet me zhvillim të madh në fushën e turizmit, t'u vendoseshin ca yje, se na dolën të gjithë me 5, dhe në përpjekje të vazhdueshme për të denigruar të vetmin institucion arsimor të arsimit të lartë, UT, pa stafin e të cilit, për shkak të përgatitjes akademike, nuk do kishin as liçensa për mastera, as për doktoratura. Pak më shumë mirënjohje!