"Një letër për (dhe në vend të) ministrit Olldashi"

Kur dëgjoj z. Olldashi të flasë për Paktin Detar, them me vete: Kjo që po lexoj është njoftim i ministrit grek apo atij shqiptar? Këtë njoftim, për të na qetësuar, mund të na e thoshte pala greke, natyrisht duke përdorur një gjuhë të pasur diplomatike, e më pas do vinte reagimi i palës shqiptare, pra i zotit Sokol Olldashi. Ky do t'i thoshte, pas edhe një zhargoni diplomatik si resto, se "korridoret e transportit nuk mbyllen edhe tek ngushticat strategjike zotëri, e as bëhet fjalë për detin Jon, por këtu kemi të bëjmë me përkatësinë e kësaj hapësire, e cila, të paktën që nga viti 1913-të, është e jona e këtë nuk e luan topi" - (ministri nuk do e kishte fjalën për Presidentin Topi...)


Por... Çudia ndodh që pala greke flet me gojën e ministrit tonë! Atëherë, ministri i vërtetë i popullit shqiptar i përgjigjet : I nderuar përfaqësues i palës greke ! Me konsideratën më të lartë për popullin dhe shtetin mik të Greqisë, do duhet t'ju deklaroj se, ne nuk e firmosim projektin tuaj të marrëveshjes, sepse ju aty na rrëmbeni padrejtësisht një pjesë të konsiderueshme të hapësirës tonë strategjike ujore.


Vërtet shohim çudi në garantimin tuaj se, marrëveshja "nuk cenon asnjë lloj transporti", deklarim të cilën edhe pala jonë mund t'jua bënte në çdo moment edhe juve si garanci. Ju kujtoj shkëlqesi, sikundër edhe jeni njoftuar zyrtarisht nga Qeveria e Shqipërisë, tek ajo pjesë ujore nuk janë vetëm interesat tona të sotme e të nesërme ekonomike, nuk është vetëm nevratura urbane e transportit ndër detar, apo pasuritë e mëdha nënujore e sipërfaqësore, duke çmuar lart këtu edhe qetësinë shpirtërore të banorëve të këtyre trevave, por edhe pasuria më e vyer, ajo historike zotëri. Deklarata juaj shkëlqesi, me keqardhje e pohoj, i përngjan sikur të na thoshit: toka është e jona, por ju garantojmë se nuk "cenojmë asnjë shtëpi banimi!


Dua të jem i sinqertë deri në fund me ju shkëlqesi: Ajo deklaratë na ka sjellë në memorie një thënie të Hrushovit, asokohe mik i madh i një vendi të madh: Mos mbillni grurë e misër, mbillni vetëm agrume, ju keni nevojë aq sa hanë minjtë në Bashkimin Sovjetik! Po kaq e sinqertë na u duk kjo deklaratë, zotëri, por, për një debat politik, ata na i prenë furnizimet, të na ngordhnin për bukë!


Edhe pse unë jam një antikomunist, kjo s'do të thotë se nuk marr e mësoj nga historia e të parëve të mi, zotëri. Duke ju përcjellë këtë mesazh, ndërkohë ju përcjell shkëlqesi konsideratën e lartë! Ministri, Sokol Olldashi." (Në fakt, "Ministri" Fatos Luta, për Ministrin grek, Sokolis Olldashiqi.) Sa keq e sa indinjuese!