Miratohet "Moratoriumi", lejohen motorët e ujit

Kuvendi miratoi draftin për skafet. Ndalohen me ligj për tre vjet mjetet motorike në bregdetin shqiptar

TIRANË - Ligji për Moratoriumin e Skafeve do të privojë për tre vitet e ardhshme të gjithë shqiptarët dhe fqinjët e tyre që përdorin mjete lundruese dhe mjete të tjera motorike përgjatë bregdetit shqiptar.

Kuvendi i dha dje jetë ligjit "Për shpalljen e Moratoriumit për mjetet motorike lundruese të Republikës së Shqipërisë" vetëm me votat e mazhorancës, ku 72 votuan pro, asnjë votë kundër dhe asnjë votë abstenim.

Deputetët nuk morën parasysh një prej amendimeve, pikërisht ajo që lidhej me përjashtimin e varkave me vela, ndërkohë që kanë miratuar përjashtimin nga ky ligj të motorëve të ujit.

Ligji për Moratoriumin e skafeve, i cili është kontestuar shpeshherë nga biznesmenë, qytetarë, e posedues të të këtyre mjeteve, ka marrë miratimin e Parlamentit pas propozimit të qeverisë shqiptare.

Zgjatja e afateve të këtij moratoriumi është cilësuar nga qeveria shqiptare si një domosdoshmëri, që do të bëjë të mundur luftimin me efikasitet të trafiqeve të klandestinëve dhe të lëndëve narkotike që tentohen të transportohen nëpërmjet deteve shqiptare.

Megjithëse ky ligj është konsideruar shpeshherë si një masë që bie tërësisht në kundërshtim me liritë dhe të drejtat themelore të njeriut, duke diskriminuar shtetasit shqiptarë në raport me shtetasit e vendeve të tjera, të cilët nuk privohen nga një ligj i tillë, ai tashmë do të fillojë të zbatohet duke privuar veçanërisht pushuesit shqiptarë e të huaj gjatë pushimeve verore në vendin tonë.

Ky ligj është kontestuar edhe nga grupet e interesit, bashkitë e qyteteve bregdetare të cilat e shohin si një masë që prek të drejtën e funksionimit të bizneseve të tyre.

Në këtë mënyrë, ky moratorium ashtu siç ka deklaruar edhe Kryeministri Sali Berisha do të vazhdojë të qëndrojë në fuqi deri sa mazhoranca aktuale të jetë në pushtet. Nga ky moratorium do të përjashtohen vetëm mjetet lundruese që janë në përdorim të organeve shtetërore dhe atyre portuale.

Gjithashtu, nuk do të jenë pjesë e këtij moratoriumi edhe mjetet, të cilat janë të destinuara për peshkim, për transportin e mallrave, si dhe transportin detar.