Plagosja e këshilltarit në Vlorë, PS: Tjetër provë e krizës së rëndë politike

TIRANË- Një tjetër provë të krizës së rëndë politike që po kalon vendi e ka quajtur Partia Socialiste ngjarjen e mbrëmshme në Vlorë, kur u hodh në erë makina e këshilltarit bashkiak të Vlorës, Merond Hoxhaj.

Gjatë një deklarate për mediat, deputetja e PS-së, Luiza Xhuvani ka theksuar se kjo ngjarje është një tregues i shkallës së lartë të konfliktualitetit politik, që shpeshherë, fatkeqësisht, përshkallëzohet edhe në akte të tilla dhune fizike, që rrezikojnë të marrin jetë njerëzish.

"Si deputete e qarkut të Vlorës, por mbi të gjitha si nënë, i bëj thirrje Sali Berishës, të heqë dorë nga politika e përplasjes, nga politika e konfliktit. Të heqë dorë nga gjuha e urrejtjes, nga fjalori që nxit kundërvënie dhe që për pasojë, rezulton edhe në ngjarje të tilla, si ajo e mbrëmshmja, kur Morand Hoxha, fatmirësisht shpëtoi gjallë, por që në qytetin e Vlorës dhe në të gjithë Shqipërinë la një shije të hidhur dhe përforcoi edhe më shumë ndjenjën e frikës dhe pasigurisë"- tha Xhuvani.

Sipas saj, është e pafalshme për këtë qeveri, që ngjarje si ajo e mbrëmshmja, kanë filluar të bëhen gjithmonë e më të shpeshta, duke pushtuar gjithmonë e më shumë ekranet e familjeve shqiptare.
Më tej, ajo ka kërkuar zbardhjen e ngjarjes dhe vënien para përgjegjësisë për autorët.

Vlorë, tritol makinës së këshilltarit bashkiak

UPDATE- Del nga rreziku per jeten anëtari i këshillit bashkiak të Vlorës, Morand Hoxhaj, automjeti i te cilit u hodh mbreme ne ere nga persona ende te paidentifikuar. Shperthimi ndodhi mbrëmë rreth orës 21:40 në lagjen "Isa Boletini", në kohën që Hoxha sapo ka dalë nga makina. Bëhet e ditur se 43-vjeçari ka parkuar në afërsi të shkollës 9-vjeçare "Ismail Qemali" ku mësohet të ketë edhe shtëpinë. Pikërisht në kohën që këshilltari ka zbritur, automjeti i tij tip "Benz 240" i bardhë, me targa që nuk mund të lexohen për shkak të dëmeve, ka shpërthyer, teksa dyshohet se shpërthimi është bërë me telekomandë. Një sasi e konsiderueshme lënde shpërthyese, tritol, është vendosur në të, saqë makina është kthyer në një grumbull hekurash, ndërsa Morand Hoxhaj ka mbetur i plagosur dhe në gjendje të rëndë.

Askush nuk ka pranuar të flaës lidhur me shkaqet që kanë çuar në një hakmarrje kaq të dhunshme kundrejt anëtarit të këshillit bashkiak të qytetit, ndërsa zyrtarisht policia shprehet se po hetohet në pista të ndryshme pa përjashtuar asgjë. Pavarësisht se mes qytetarëve të Vlorës Hoxhaj njihet si një person i qetë, burime të brendshme nga policia shprehen se një nga pistat ku po hetohet, janë prishjet e pazareve.
Morand Hoxhaj u prangos nga policia e Vlorë në muajin prill të vitit të kaluar për armëmbajtje pa leje. Por arrestimi i tij zgjati shumë pak, pasi ai doli dhe u lirua nga akuzat, duke vijuar edhe detyrën e tij si anëtar i këshillit bashkiak. Në vitin 2007, kur dhe u bë pjesë e këshillit, ai ishte nën siglën e LSI-së, ndërsa më pas kaloi nën siglën e PS-së, bashkë me disa anëtarë të tjerë të këshillit.