Rama: BE-ja të mbështesë lëvizjen e lirë të shqiptarëve

Kryetari i PS-së, Edi Rama, flet për transparencën e zgjedhjeve dhe procesin e liberalizimit të vizave

STRASBURG - Kryetari i Partisë Socialiste, Edi Rama, ka kërkuar që Bashkimi Europian të liberalizojë sa më parë vizat me qytetarët shqiptarë.

Në një intervistë të dhënë për mediat në Strasburg, Rama ka theksuar se Europa duhet të mbështesë lëvizjen e lirë të shqiptarëve, sepse sipas tij, ata nuk duhet të paguajnë për politikën e vjetër, që nuk mundi ta kryejë këtë proces në kohën e duhur, kur qytetarët e Serbisë, Maqedonisë e Malit të Zi, lëvizin lirisht në hapësirën Shengen.

"Ashtu sikundër është shumë e rëndësishme që Europa e gjitha ta mbështesë lëvizjen e lirë të shqiptarëve, sepse shqiptarët nuk kanë asnjë arsye të paguajnë më për një politikë të vjetër dhe të verbër, që i mban ende mbyllur, i mban ende të izoluar në mes të një Ballkani që është çliruar përfundimisht, ku të gjithë lëvizin lirisht. E përsëris, Shqipëria duhet njëkohësisht t'i bashkëngjitet të gjithë vendeve të tjera që lëvizin sot lirisht nëpër Europë", - tha dje Rama.

Sipas liderit socialist, arsyet kryesore që e kanë sjellë në Strasburg grupin socialist shqiptar, është transparenca e zgjedhjeve të 28 Qershorit dhe heqja e menjëhershme e regjimit të vizave. Për këtë arsye, sipas tij, Europa duhet të mbështesë kryerjen e transparencës së zgjedhjeve të Qershorit, me qëllim që zgjedhjet e ardhshme të mos zhvillohen si zgjedhjet e fundit parlamentare.

"Dy janë çështjet e mëdha që na kanë sjellë këtë herë këtu në Parlamentin Europian; transparenca e zgjedhjeve të shkuara për të mos lejuar që të ardhmet t'ju ngjajnë të shkuarave dhe njëkohësisht liberalizimi i menjëhershëm i vizave për të gjithë shqiptarët.

Është shumë e rëndësishme që Europa ta mbështesë procesin e transparencës; Europa ta mbështesë betejën me korrupsionin elektoral; Europa ta mbështesë problemin madhor të ndarjes nga një e shkuar dramatike zgjedhjesh të deformuara e të kontestuara", - u shpreh ai.

Rama vuri në dukje se transparenca e këtyre zgjedhjeve është një domosdoshmëri për të ardhmen e Shqipërisë në familjen europiane. Për këtë arsye, sipas tij, Shqipëria duhet të ndahet nga praktika patolerueshme e manipulimit të zgjedhjeve.