"Tokat me qira", Topi dekreton ligjin

TIRANË - Me gjithë kundërshtimin e pronarëve, Presidenti i Republikës, Bamir Topi, ka dekretuar dje ligjin "Për përdorimin dhe shfrytëzimin e tokave bujqësore të pakultivuara". Ky ligj parashikon që tokat e pakultivuara hyjnë në qarkullim ekonomik nëpërmjet qiradhënies palëve të treta.

Megjithëse ky ligj nuk cenon titullin e pronësisë, sipas pronarëve, ai është pasojë e ligjit 7501 dhe se askush nuk ka të drejtë të vërë në përdorim pronën e pronarit legjitim. Ligji, i cili është dekretuar nga Presidenti synon të rikthejë në qarkullim ekonomik tokat bujqësore, veçanërisht ato të Ultësirës Perëndimore që kanë edhe potencialin më të madh prodhues të vendit.

Personat që janë të interesuar për ta përdorur me qira tokën bujqësore do të nënshkruajnë një kontratë me autoritetet vendore që varion nga dy deri në pesë vjet, por pa cenuar titullin e pronësisë.

Megjithatë, pronari i ligjshëm i tokës bujqësore gjatë periudhës së kontratës, nuk ka të drejtë të bëjë kërkesë për rikultivimin e saj. Vetëm pas përfundimit të kësaj kontrate që mund të jetë dy, tre ose pesë vjeçare, ai ka të drejtë të kryejë kërkesën e tij për t'iu rikthyer punimit të tokës bujqësore duke e futur atë në qarkullim ekonomik.

Por, nëse pronarët e ligjshëm nuk e vendosin në punë tokën e tyre ajo u jepet sërish me qira një pale të tretë. Sipas të dhënave të Ministrisë së Bujqësisë, rezultojnë të papunuara rreth 50 mijë ha nga sipërfaqja në pronësi private. Shumica e tokave lihet djerr edhe për shkak të emigracionit në rritje të banorëve në zonat rurale.