Zyra e Konsulencës anketon 200 biznese

Rreth 200 veprimtari të biznesit prodhues dhe tregëtar në Qarkun e Gjirokastrës janë përfshirë së fundi në anketimin e organizuar nga Zyra e Konsulencës së Biznesit.
 
“Anketimi ka si qëllim tërheqjen e mendimit të biznesve në rrethet e Përmetit, Tepelenës dhe Gjirokastrës në lidhje me problematikën që ata ndeshin në veprimtarinë e tyre të përdishme”, pohojnë organizatorët e tij.

Sipas organiztarorve anketimi i ndërmarrë parashikon pyetje për kapacitet e biznesve në fjalë, burimet e tyre financiare dhe njerëzore, marrëdhëniet që bizneset kanë vendosur me njeri-tjetrin apo me organizmat tatimore dhe ato shtetërore etj.

Mbështetur mbi të dhënat që do të vilen nga ky anketim konsulentët e biznesit synojnë përpilimin e një strategjie në lidhje me mbështetjen që mund ti japin zhvillimit dhe ecurisë së biznesit në rajonin jugor.

Nga ana e Zyrës së Konsulencës së Biznesit në Gjirokastër vazhdon përgatitja e skedave të veçanta për bizneset e mesme dhe të vogla që ushtrojnë aktivitetin e tyre në rrethet e Përmetit, Tepelenës dhe Gjirokastrës.

Zyra e Konsulencës disponon aktualisht dosje të veçanta për rreth 300 biznese që ushtrojnë aktivitetin e tyre në Qarkun e Gjirokastrës ndërkohë që stafi i saj vazhdon punën për dokumentimin e plotë të veprimtarive të biznesit të mësëm dhe të vogël në rajonin jugor të vendit.

Çelja e kësaj zyre e cila ka si synim ti japë ndihmesë zhvillimit të biznesit të mesëm dhe të vogël në Qarkun e Gjirokastrës  u bë e mundur në kuadër të programeve ndërkufitare Intereg III.