Starton projekti rajonal për folklorin

Ka startuar në fundjavë në kalanë e gurtë të Gjirokastrës një projekt rajonal i Shoqatës “Miqësia” në bashkëpunim me Këshillin e Qarkut Gjirokastër dhe bashkinë e Zagorit (Greqi) në lidhje me përkujdesjen karshi trashëgimisë kulturore, folklorike dhe etnografike në Jugun e Shqipërisë dhe veriun e Greqisë.

Projektin rajonal “ Promovimi i veprimtarive kjulturore-artistike-garanci për identitetin e përbashkët dhe bazë për integrimin ndërkufitar” ka çelur siparin në skenën e gurtë të Festivaleve Folklorike Kombëtare në kalanë e Gjirokastrës. Të pranishëm në këtë promovim kanë qenë përfaqsues të pushtetit lokal, administratës vendore, specialistë te folklorit, trashëgimisë kultutore,intelektualë, gazetarë etj.

“Nisma synon promovimin e vlerave të trashëgimisë kulturore të Jugut të Shqipërisë dhë zonës se Zagorit (Greqi) nëpërmjet aktiviteteve të përbashkëta si festivale, konferenca shkencore, publikime në media etj”, thotë një ndër realizuesit e kësaj nisme, Stefan Arseni. Projekti ka një shtrirje  kohore dy vjeçare dhe realizimi i tij mbështetet nga BE-IPA, Komponenti i Bashkëpunimit Ndërkufitar.