Shpërthen bombula e gazit, digjet shtëpia

Shkodër- Një banesë në një fshat të Shkodrës është përfshirë nga flakët, pas shpërthimit të një bombule gazi. Lajmi bëhet i ditur nga forcat e zjarrfikëses, të cilat të lajmëruar nga banorët e zonës kanë shkuar me urgjencë në vendin ku ndodhi shpërthimi.

Nga të dhënat e para mësohet se në flakë është shtëpia e Prek Lleshit, nga fshati Pistull i Shkodrës. Banesa ndodhet në kodër, pak e izoluar dhe rruga deri aty mësohet se është e vështirë.

Sipas sinjalizimit të banorëve, në banesë vetëm pak minuta më parë është dëgjuar një shpërthim, e më pas janë parë flakë e tym. Fqinjët kanë kërkuar ndihmë dhe në drejtim të vendit po shkojnë edhe forca të policisë.

Paraprakisht nuk bëhen të ditura dëmtime në njerëz, por mendohet se ka vetëm dëme materiale. Megjithatë, pritet që të izolohet vatra e zjarrit për të shmangur përhapjen e më pas do të punohet për zbardhjen e shkaqeve.