Autoshkollat: Do rrisim çmimin, është rritur nafta

Pronarë të autoshkollave në kryeqytet janë shprehur se janë gati të rrisin çmimnin e marrjes së patentës pas rritjes së çmimit të naftës.
Gëzim Kurti, pronar i një autoshkolle tha se: “aktualisht një kursant duhet të paguajë 35000 lekë për regjistrim në autoshkollë, por kjo shifër mund të rritet, për shkak të rritjes së çmimit të naftës në treg”.
Gjithashtu mësohet se ka ndryshuar edhe procedura e marrjes së patentës. Një kursanti tani do ti duhen 60 ditë për të marrë patentën dhe jo 30 siç ishte më parë.

Asnjë i interesuar që ndjek kursin për marrjen e lejes së drejtimit të patentës nuk mund të provojë aftësitë e tij në timon, nesë nuk kalon provimin e teorisë.

     Ndryshe nga më parë, kur teoria dhe praktika për marrjen e patentës kryehej paralelisht, çdo kursanti i duhet fillimisht të ushtrohet në teori dhe pasi e kapërcen këtë test ai mund të ushtrohet në praktikë.

     Rregullat për t’u pajisur me një patentë u ndryshuan me një vendim të Këshillit të Ministrave, vendim që u morr të mërkurën e kësaj jave dhe që pritet të zbatohet pas botimit në Fleteron Zyrtare.

     Sipas rregullave të reja, i interesuari për marrjen e patentës do të ushtrohet më parë në teori, proces që zgjat 30 ditë dhe më pas testohet për njohuritë e marra deri në pesë herë, përgjatë dy viteve pas regjistrimit në kurs, nga 3 herë që ka qenë më parë testi i njohurisë. Nëse nuk e kalon testin e teorisë ai nuk mund të ushtrohet në praktikë, (në timon), një proces që zgjat gjithashtu 30 ditë.

     Kjo mënyrë e re për marrjen e patentës shihet mjaft pozitivisht nga drejtuesit e autoshkollave, të cilët gjykojnë se shpesh herë kursantët e anashkalonin  pjesëmarrjen në leksionet e teorisë.
    
     Gjithashtu, me vendimin e ri të qeverisë, janë pakësuar dhe dokumentet e nevojshme për rregjistrim.