Brenda 6 muajve, 106 divorce në Gjirokastër

Gjirokastër-Tendenca në rritje e çifteve për tu divorcuar vazhdon të jetë një fenomen shqetësues në Qarkun e Gjirokastrës. Sipas burimeve zyrtare në Gjykatën e Shkallës së Parë në Gjirokastër, gjatë gjashtëmujorit të parë të vitit 2008 janë zhvilluar në total 106 çështje gjyqësore për ndarje familjare.

Gjatë tremujorit të dytë të këtij viti në rrethet e Përmetit, Tepelenës dhe Gjirokastrës vërehet një tendencë në rritje përsa i përket numrit të divorceve. Në këtë periudhë pranë Gjykatës së Shkallës së Parë në Gjirokastër janë rregjistruar 6 kërkesa më shumë për ndarje famijare krahasuar me tremujorin e parë të 2008-ës.

“Një fenomen i tillë shpjegohet me problematikën që po kalon aktualisht familja shqiptare si vështirësitë ekonomike, emigracioni masiv etj”, thotë sociologu Llambi Bllani.

Për të frenuar disi këtë dukuri sipas sociologut Bllani, do të ishte mirë që përpara se çiftet t’i drejtohen gjykatës për të zgjidhur problemet e tyre duhet të kërkojnë ndihmën e qendrave këshillimore dhe specialistëve të ndryshëm në këtë këtë drejtim duke arritur të bëjnë kështu një përpjekje për të mbajtur të bashkuar familjen e tyre.