Kavajë, bllokohen 15 kg heroinë, një në pranga

Tiranë- Policia ka bllokuar pak më parë një sasi prej 15 kilogramë lëndë narkotike, e dyshuar si heroinë. Sipas burimeve të policisë së Tiranës bëhet e ditur se në pranga është vënë shtetasi, Lutfi Shabani, i dënuar me parë, si pjesë e grupit të Emiliano Shullazit.

“Lënda narkotike u bllokua në makinën e Shabanit, gjatë një kontrolli të policisë, pas informacioneve paraprake të marra në rrugë operative”- kanë bërë me dije burimet policore.

Operacioni antidrogë është kryer në afërsi të qytetit të Kavajës, nga antikrimi i organizuar i policisë. Nga hetimet paraprake mësohet se droga është kapur në një automjet, i cili po shkonte në drejtim të Durrësit.

Sipas policisë, i ndaluari Lutfi Shabani ka qenë duke drejtuar automjetin ku ndodheshin 15 kg heroinë, e futur në një çantë. Aktualisht policia është duke hetuar për të zbardhur vendin nga vinte droga e më pas për të përcaktuar edhe destinacionin e saj. Dyshohet se ajo ka qenë për trafik të jashtëm, por, sipas ekspertëve është ende herët për të mbërritur në përfundime.

I ndaluari ka qenë më parë person me precedentë penalë, madje ka qenë i dënuar me 2.5 vite burg. Ndërkohë që policia, duke se ka pasur informacione se ai mund t’i ishte rikthyer trafikut të drogës.