Gjirokastër, priten 60 lidhje të paligjshme të ujit

Pas shpallje së gjendjes së emergjencës në lidhje me furnizimin me ujë të pijshëm të qytetit të Gjirokastrës, Ndërmarrja e Ujësjsllësit, po punon për minimizimin e problemeve që mund të ndeshin konsumatorët në këtë situatë.

Aktualisht puna e specialistëve të ujësjellësit është përqëndruar për mirëmbajtjen nga ana teknike të disa prej linjave kryesore të furnizimit me ujë të pijshëm të qytetit.

“Gjatë ditëve të fundit ne kemi realizuar një sërë ndërhyrjesh për eliminimin e rreth 60 lidhjeve të paligjshme në rrjetin e ujësjellësit në disa zona dhe lagje të qytetit”, thotë drejtori i Ujësjellësit, Dashmir Qeli.

Gjatë punës stafi i ujësjellësit ka konstatuar faktin se mjaft qytetarë kanë abuzuar duke ndërhyrë në mënyrë të paligjshme në rrjet çfarë ka shkaktuar edhe probleme në furnizimin me ujë të pijshëm të komunitetit gjirokastrit.

Sipas drejtorit Qeli, ”ujësjellësi do të ndëshkojë penalisht çdo qytetar që ndërhyn në mënyrë të paligjshme në rrjetin e furnizimit me ujë të pijshëm”.