Gjykata lë në burg 3 grabitësit e bankës

Tiranë- Gjykata e Tiranës ka lënë në burg pa afat autorët e grabitjes së filialit të bankës greke në Tiranë, javën e shkuar.

Në seancën e zhvilluar sot janë përcaktuar ndaj tre të arrestuarve, Edmir Shehi, Fation Karenxha dhe Luan Kuci, masat e sigurisë.

Në bazë të provave dhe të dhënave nga hetimet, gjykata pasi ka dëgjuar palët ka vendosur që të tre të arrestuarit të qëndrojnë në burg pa afat, që do të thotë se ata do të rrinë në burg deri sa të vendoset masa e dënimit për krimin e grabitjes që kanë bërë.

Grabitja ndodhi mesditën e së premtes së shkuar, kur autorët me maska dhe të armatosur hynë në ambinetet e filialit të bankës NBG, që ndodhet në autostradën Tiranë-Durrës, në kilometrin e 9-të.

Në kërcënimin e armëve ata mundën të mernin 10 milionë lekë të vjetra dhe më pas u larguan, duke qëndruar të fshehur për disa ditë. Policia pas hetimeve bëri arrestimin e tyre, dy u kapën në një shtëpi në Domje, kurse tjetri në Dibër.