Kukës, ulet qiraja për tregtarët e agroushqimeve

Tregtarët kuksianë në tregun agro-ushqimor të qytetit do të paguajnë qira më të ulët për ambientet që përdorin.  Administratorët e këtij tregu kanë vendosur të ulin me 50 për qind qiratë, duke lehtësuar kështu barrën e tregtarëve.

Shoqëria Anonime që administron tregun agroushqimor ka bërë të ditur se qiraja mujore do të jetë 5 mijë lekë të reja.

Tregtarët shprehen të kënaqur, por kërkojnë nga Bashkia që të eliminojë konkurrencën e pandershme. Tregu i ri i qytetit nisi të ndërtohej në vitin 2006. Inaugurimi i tij u bë në muajin qershor të këtij viti. Hapja dhe funksionimi u vonua disa muaj, kjo pasi pati një konflikt mes ministrisë së bujqësisë dhe bashkisë së këtij qyteti për marrjen në dorëzim të tregut. Ndërtimi u mundësua nga Projekti i shërbimeve Bujqësore, me fonde të Bankës Botërore.