Aksidentet në punë, 2 të vdekur në Tiranë

Tiranë- Dy shtetas kanë humbur jetën si pasojë e aksidenteve në vendet e punës. Policia e Tiranë njofton se në Spitalin Ushtarak ka mbërritur i vdekur shtetasi ArbenLeçka, 44-vjeç, me detyrë hidraulik në bashkinë e Kamzës. Pa jetë është gjetur edhe një tjetër shtetas, 67-vjeçari, Baftjar Koxha, roje objekti në një pallat në ndërtim e sipër në Unazën e Re.

Nga hetimet paraprake mësohet se 44-vjeçari me punë hidraulik në Bashkinë Kamëz gjatë punës për riparimin e rrjetit, në momentin e futjes në një pusetë buzë rrugës në Çekreze i bie kapaku i betonit të pusetës duke e dëmtuar rëndë në kokë.

“Të aksidentuarit iu dha ndihma nga kalimtarët e rastit por si pasojë e dëmtimeve të marra nuk mundi të jetonte dhe gjeti vdekjen gjatë transportit për në Spitalin Ushtarak Tiranë”- thanë burimet.

Viktima tjetër, sipas policisë me punë roje objekti, gjatë lëvizjes ka humbur ekuilibrin duke rënë nga një lartësi prej 3 m ku dhe ka gjetur vdekjen e menjëhershme.