Bilanci i zjarreve, 1050 vatra gjatë verës

Tiranë- Drejtori i Përgjithshëm i Emergjencave Civile në Ministrinë e Brendshme, Alfred Olli ka publikuar sot gjatë një konference për shtyp bilancin e zjarreve që kësaj vere, duke deklaruar se situata ka qenë më e qetë se një vit më parë.

“Gjatë stinës së verës në të gjithë territorin e vendit kemi pasur 1 050 shfaqje zjarresh, afro 400 më pak se në të njëjtën periudhë të vitit të kaluar”- tha Olli, duke mos bërë të ditur sipërfaqet e shkrumbuara, por duke u mjaftuar me konstatimin se këtë verë nuk janë prekur parqet kombëtare.

Sipas tij, numri i zjarreve problematikë, që shkaktojnë dëme të mëdha në ekonomi, mjedis dhe prona publike e private, ka qenë 95.

Suksesi më i madh, sipas tij në këtë rast ishte shmangia e dëmtimit nga zjarri të pyjeve të larta dhe parqeve kombëtare. Dëmtime nga zjarret ka pasur kryesisht në bimësinë e ulët e të mesme dhe në ullinj e dru frutorë.

Strukturat e Ministrisë së Brendshme kanë ndërhyrë në të gjitha rastet e rënies së zjarreve, në të gjithë territorin e vendit, duke kryer 980 operacione në terren dhe 70 të tjera në banesa e objekte të ndryshme. Përsa i takon banesave, janë djegur gjithsej 12.

Olli ka kujtuar se në operacionet për shuarjen e zjarreve nga ajri janë ndihmuar me mjete të specializuara nga Italia dhe Greqia, në qarqet Gjirokastër, Vlorë, Fier, Korçë dhe Dibër.

Sipas tij edhe në projektbuxhetin e vitit të ardhshëm janë planifikuar fonde shtesë për forcimin e mëtejshëm të luftës kundër zjarreve.