Makina jashtë rrugë, katër të plagosur rëndë

Katër persona kanë mbetur të plagosur rëndë në një aksident automobilistik, që ndodhi sot në autostradën Fushë- Krujë-Lezhë.

Sipas policisë aksidenti ndodhi në afërsi të fshatit Derven pranë qytetit të Krujës, kur autovetura tip Benz me targa TR 5032 M, e cila po udhëtonte në drejtim të kryeqytetit ka dalë nga rruga. Të plagosurit kanë qenë duke udhëtuar në të njëjtin automjet.

Policia bën me dije se të plagosurit u dërguan me urgjencë në spitalin Ushtarak të Tiranës, për shkak të gjendjes së tyre të rëndë. Mjekët e këtij spitali, kanë sqaruar se dy nga personat e plagosur, mes të cilëve drejtuesi i mjetit dhe një grua ndodhen në gjendje kritike për jetën.

Pas aksidentit, policia mbërriti në vendin e ngjarjes për të zbuluar shkaqet dhe rrethanat e aksidentit. Hetimet e para nga këqyrja e vendit të ngjarjes dhe mjetit të përfshirë në aksident bëjnë me dije se shkak mund të jetë bërë një defekt, për shkak të të cilit drejtuesi i mjetit mendohet se ka humbur kontrollon dhe makina ka dalë jashtë rruge.