Plagoset 24-vjeçari në Vlorë, mister rrethanat

Vlorë- Një 24-vjeçar është plagosur natën e mbrëmshme në Vlorë, në rrethana ende misterioze. Sipas burimeve të policisë lokale, mësohet se i dëmtuar ka mbetur shtetasi Olgert Mustafaraj 24-vjeç, banor i këtij qyteti.

“Ai është qëlluar me armë zjarri dhe ka marrë plagë në këmbë dhe në pjesën e krahëve”- thanë të njëjtat burime.

I riu është transportuar me urgjencë në spitalin kirurgjik të qytetit ku ndodhet ende në kujdesin e mjekëve.

Sipas policisë, ngjarja ndodhi në zonën e Skelës, në lagjen “Pavarësia”, të Vlorës, por ende nuk ka detaje rreth ngjarjes dhe rrethanave në të cilat ka ndodhur ajo.

Mësohet se edhe pas dëshmisë së të dëmtuarit nuk është zbuluar asgjë rreth autorësisë apo motiveve që mund të kenë shkaktuar këtë ngjarje.

Materialet i kanë kaluar tashmë prokurorisë për hetime të mëtejshme, ndërkohë që policia po heton për zbardhjen e ngjarjes.