Aksident në Korçë, 1 vdes, 3 plagosen

Korçë- Një e re ka humbur jetën dhe tre të tjerë mbetën të plagosur rëndë gjatë një aksidenti në qytetin e Korçës. Ngjarja u shënua sot në vendin e quajtur ‘Kthesa e Çifligut, kur makina me të cilën ishin duke udhëtuar 4 persona ka dalë nga rruga në mënyrë të papritur.

Pas daljes nga rruga makina ka përfunduar në arë, por më parë është batuar dhe rrokullisur. Për pasojë, një 23-vjeçare, me inicialet Xh.R, që ndodhej në makinë, ka humbur jetën, kurse tre të tjerët, mes tyre edhe drejtuesi i mjetit kanë marrë plagë të rënda.

Ata janë transportuar në spital, ku sipas mjekëve ndodhen në gjendje kritike për jetën. “Të dëmtuar nga aksidenti kanë mbetur Erjon Maliqi, 30-vjeç, drejtuesi i mjetit dhe dy femra, 58 dhe 28-vjeçare, që udhëtonin së bashku”- kanë thënë burimet e policisë.

Grupi hetimor i mbërritur në vendin e aksidentit nuk ka përcaktuar ende shkaqet e ngjarjes.