Vlorë, festohet 64 vjetori i çlirimit

Vlorë- Nderim për të rënët që dhanë jetën për Vlorën. Ky ka qenë mesazhi i përcjellë sot në ditën e çlirimit të Vlorës. Përkujtimi i 64 vjetorit ka mbledhur në Varrezat e Dëshmorëve të qytetit, qytetarë e veteranë. Në ceremoninë e rastit kanë marrë pjesë autoritete të pushtetit, vendorit, përfaqësues të forcave të ndryshme politike e përfaqësues të shoqatave.

Dëshmorët kanë bashkuar edhe politikën, pasi në ceremoni kanë marrë pjesë përfaqësues të spektreve të kundërta. Autoritetet e kanë cilësuar këtë një ditë të veçantë për Vlorën dhe historinë e saj, ndërsa më pas kanë vijuar vizitat nëpër familjet e dëshmorëve.

Një stendë e veçantë sot ka qenë edhe në Muzeun Historik të qytetit. Foto që të dëshmorit të parë Teli Ndini, armë të luftës së dytë botërore e të tjera objekte të luftës kanë përkujtuar 64 vjetorin e çlirimit. Vlora numëron 1250 dëshmorë të rënë gjatë luftës së Dytë Botërore.