Konventa, 10 mijë protestues kundër Bush

Protesta masive të dhunshme në Minesota, ku po mbahet Konventa e republikanëve. Arrestohen 280 vetë

SHBA- Konventa e Republikanëve në Shën Pol të Minesota-s ka nxitur protesta masive të dhunshme. Policia amerikane ka deklaruar se ka arrestuar më shumë se 280 vetë gjatë protestave të dhunshme të së hënës, në ditën e parë të kuvendit republikan në qytetin e Shën Polit në Minesota. Policia tha se 130 nga të arrestuarit mund të përballen me akuza kriminale. Protestuesit thyen dritaret e një dyqani dhe të një banke dhe tentuan të bllokonin disa rrugë. Zëdhënësi i policisë i tha “Zërit të Amerikës” se protestuesit po kështu kishin hedhur gurë dhe tulla kundër policisë dhe i kishin vënë zjarrin një koshi plehrash, të cilin e kishin hedhur më pas mbi një automjet policor.

Zëdhënësi tha se grupe të vogla protestuesish fshihen pas trazirave të cilat, sipas policisë, kryen një numër të konsiderueshëm krimesh dhe sulme kundër oficerëve të policisë. Ai tha se policia përdori gazin lotsjellës dhe hodhi piper kundër protestuesve, për të neutralizuar protestat. Arrestimet u zhvilluan ndërsa demonstrues të tjerë protesuan në mënyrë paqësore në Shën Pol, kundër luftës në Irak dhe politikave të administratës së presidentit Bush.

Zyrtarët thanë se nga 8 deri në 10 mijë protestues mendohet të kenë marrë pjesë në protesta, gjatë kohës kur kandidati republikan për president i Shteteve të Bashkuara të Amerikës, Xhon Mekein dhe delegatët e partisë së tij po zhvillojnë Konventën. Protestuesit kanë shfrytëzuar këtë ngjarje, për të kundërshtuar politikat e presidentit Bush dhe administrës së tij, kryesisht për luftën në Irak, duke i dhënë kësisoj mbështetjen kandidatit demokrat Barak Obama.