Në shumicë jemi të prirur ose te bindshem

NË SHUMICË JEMI OSE TË PRIRUR OSE TË BINDSHËM


PYETJE NE EMISIONIN SI TE BEHESH MILIONER /

Në përgjithësi, cila do të ishte mënyra dhe rruga më e mirë për të vepruar me rezistuesit në një kompani që përpiqet të ndryshojë?


PERGJIGJE NGA KOKEDHIMA / Në fakt, këtë problematikë e ndeshin të gjitha kompanitë në të gjitha tregjet. Kudo ka vizionarë që përpiqen të implementojnë vizione të reja, të implementojnë reforma dhe mendësi të reja. Është shumë e kuptueshme edhe që të ketë rezistencë në një ekip ekzistues. Madje është shumë normale kjo gjë. Në një shoqëri ka gjithnjë njerëz të prirur për të përqafuar të renë, ashtu si] ka njerëz që nuk e kanë këtë prirje. Padyshim që ekziston edhe një pjesë e tretë, që është padyshim një pjesë e vogël, minorancë si kudo, që jo vetëm nuk ka prirjen e ndryshimit, por edhe reziston në koncepte të vjetra, në koncepte tradicionale, pra nuk është e gatshme të përqafojë reforma, mendësi të reja, vision të ri.

Çështja qëndron këtu që në shumicë njerëzit janë ose të prirur ose të bindshëm. Është normale që një menaxher tu shpjegojë njerëzve se nga vizioni i tij i ri ata do të përfitojnë, sepse në fakt ata realisht përfitojnë financiarisht dhe moralisht nga sukseset e kompanisë. Është e kuptueshme që nëse ky vision përcakton më shumë shitje, me shumë të ardhura, apo pozicion më të fortë të kompanisë në treg, kjo do të thotë që vetë këta shefa dhe punonjës kanë një pozitë më të fortë, një punë më të sigurtë dhe më shumë përfitime ekonomike. Duke shpjeguar me detaje vizionin, thelbin dhe konceptin e reformave që i jep një pozitë më të fortë kompanisë, praktikisht një menaxher ka vënë në rrugë të mbarë shumicën dërrmuese të kompanisë, atë shumicë që i ka përqafuar këto koncepte me prirjet e tyre të brendshme apo thjesht për shkak se e kanë lehtësisht të mundur që të përshtaten me një kërkese të re. Nëse ka ndonjë që nuk dorëzohet dhe që reziston fort në pozitat e vjetra unë mendoj që ky duhet të largohet.