"Tek vetja, duhet parë arsyeja e një dështimi"

PYETJE NË EMISSIONIN "SI TË BËHESH MILIONER"

- Biznesmenët shqiptarë kanë bërë sukses para disa vitesh, kur tregu shqiptar ishte i varfër dhe konkurrenca e munguar. A janë këta biznesmenë po kaq të suksesshëm edhe sot kur konkurrenca është rritur shumë brenda bizneseve shqiptarë, por edhe për shkak të bizneseve të huaja që operojnë në Shqipëri? Duket sikur një pjesë e bizneseve kanë vështirësi të mëdha dhe disa janë në prag të falimentit.
 

PËRGJIGJE NGA KOKËDHIMA:

Sigurisht që momentet historike ofrojnë shanse të ndryshme për njerëzit. Edhe variablat ekonomikë dhe risqet janë të ndryshme, në kohë të ndryshme. Një treg më i zhvilluar e kërkon biznesin në nivele më të larta. Gjithnjë do të ketë biznese që kërcënohen nga falimentimi. Nuk mendoj se ka ndonjë rëndësi prezenca e biznesit të huaj në Shqipëri, për të vështirësuar pozitën e biznesit shqiptar. Çdo biznesmen, çdo menaxher duhet ta shohë problemin brenda vetes së vet dhe jo tek mjedisi i jashtëm. Shpeshherë ne takojmë, madje mua pak më ka qëlluar rasti të dëgjoj njerëz që dështojnë, të cilët nuk shohin nga vetja, por nga të tjerët. Në përgjithësi përpiqen të gjejnë shkaqet e dështimit tek një tjetër, tek një partner i keq, tek "dikush" që nuk më ka qëndruar korrekt, tek bankat, dhe shohin shumë pak tek vetja. Tek vetja duhet parë arsyeja e një dështimi. Niveli i dëshirës për të pasur sukses, për të bërë sukses në çdo kohë, pavarësisht nga situata e tregut, është përcaktues. Niveli i dëshirës gjeneron energjitëkryesore për ta bërë vetë suksesin. Vazhdimisht njerëzit janë të prirur që të thonë: "Si ta bëj këtë, si ta bëj atë, etj., etj.". Themelore është sa duam ta bëjmë, a kemi një nivel të tillë dëshire për të bërë një sukses shumë të rëndësishëm apo jo. Të duash është themeli i çështjes dhe baza për të ndërtuar një sukses. Edhe në kushtet e një tregu shumë më të rregulluar, e një tregu konkurrence më të lartë, në kushtet e konkurrencës perfekte, të duash të bësh sukses është fillimi i vetë suksesit.